Ubisoft выпусціць камп'ютарную гульню пра «змагара з сістэмай»
Кампанія Ubisoft анансавала выхад камп'ютарнай гульні «Watch Dogs 2». Распрацоўшчыкі цалкам змянілі фармат гульні.
Галоўным героем стане Маркус Холаўэй – цемнаскуры хакер з Окланда, які стаў актывістам пасля таго, як яго бацькоў загрэбла сістэма. Маркус уваходзіць у склад хакерскай групы DedSec, што кінула выклік буйным карпарацыям, злачынным групоўкам і іншым хакерам, так ці інакш небяспечным для жыцця «простых смяротных».
Згодна з заявай распрацоўшчыкаў, у гульні будзе цалкам адкрыты свет, а таксама магчымасць кааператыўнай гульні з сябрамі і спаборніцкія шматкарыстальніцкія рэжымы для прыхільнікаў такога роду забавак. Падзеі Watch Dogs 2 будуць разгортвацца ў горадзе Сан-Францыска.
Першая частка Watch Dogs займела сваю папулярнасць дзякуючы сюжэту. Тады герой гульні спрабаваў схавацца ад паліцыі, федэралаў, дзейнічаў ананімна. У Watch Dogs 2 цалкам змененая канцэпцыя разумення хакерства як субкультуры – суполка хакераў спрабуе змагацца за свабоду распаўсюду і перашкаджае ўладам сачыць за сваімі грамадзянамі. Хакерстваваць прыйдзецца паўсюль – ад лазерных паказаў на высокіх будынках і малявання графіці да ўзлому эфіру тэленавін. Кардынальныя змены чакаюць і сюжэт – адной з асноўных задач будзе набраць як мага большую колькасць падпісантаў.
Вялікую ўвагу распрацоўшчыкі надалі і рэалістычнасці – паўсюль будуць выкарыстоўвацца дроны, зброя будзе друкавацца на 3D-прынтэрах. Для таго, каб перабрацца з аднаго пункту горада ў іншы, герой зможа выкарыстоўваць паркур ці ўзламаць чый-небудзь аўтамабіль. Распрацоўшчыкі абяцаюць перадаць сапраўдную атмасферу розных раёнаў Сан-Францыска. Тое самае тычыцца і персанажаў – кожны чалавек і жывёла на вуліцы будуць жыць сваім жыццём.
Выхад гульні запланаваны на 15 лістапада гэтага года.
Трэйлер гульні:
У міліцэйскім конкурсе прыгажосці перамагла амапаўка, якая ў 2020 годе разганяла пратэсты49
Каментары