Помнік Аляксандру Неўскаму з жонкай, віцебскай князёўнай Аляксандрай і сынам Васілём усталёўваюць у Віцебску.
Сёння бронзавую скульптуру на металічным плінце даставілі з Мінска ў Віцебск да месца ўстаноўкі на плошчы Тысячагоддзя, каля драўлянай царквы Аляксандра Неўскага. Кампазіцыя вагой 6 т уяўляе сабой вобраз княжацкай пары, рукі мужа і жонкі злучаныя адна з адной, а на другой руцэ ў Аляксандра Неўскага сядзіць яго сын.
«Эскіз некалькі разоў мяняўся, але выніковы, думаю, спадабаецца публіцы. Мы па-свойму называем гэтую кампазіцыю «Сям'я», бо адной з мэтаў стварэння было ўвасобіць сямейныя каштоўнасці, бо ў перспектыве побач са скульптурай павінен быць пабудаваны палац шлюбаў», — растлумачыў адзін з аўтараў помніка, віцебскі скульптар Іван Казак.
Разам з ім над стварэннем помніка працавалі яго зямляк Аляксандр Гвоздзікаў і мінскі майстар Яўген Колчаў. А заказчыкам работ выступіла Віцебскае гарадское ЖКГ.
Урачыстае адкрыццё помніка з тэатралізаваным прадстаўленнем адбудзецца 24 чэрвеня ў праграме святкаванняў Дня горада.
Каментары