У маленькім горадзе на ўсходзе Беларусі пад назвай Слаўгарад (былая назва Прапойск) 15 пажылых людзей робяць сыры, якія славяцца на ўсю Магілёўскую вобласць.
У самім горадзе пражывае каля 8 тысяч, але мясцовыя лічаць Слаўгарад цэнтрам сыраварэння. А ўсё пачалося з таго, што некалькі сыраварскіх гаспадарак аб'ядналіся ў клуб «Слаўгарадскіх сыравараў». Іх ініцыятыву падтрымалі розныя міжнародныя арганізацыі Еўрасаюза, а Аляксандр Лукашэнка падарыў імянную прэзідэнтскую казу.
Некалькі разоў на тыдзень яны адчыняюць сваю «Сырную лаўку» і прадаюць сыры мясцовым жыхарам па даволі нізкіх цэнах. Туды мы і адпраўляемся.
Усяго «Слаўгарадскіх сыравараў» 15 чалавек — 13 жанчын і двое мужчын. Асартымент сыроў большы, чым у мінскіх крамах: вясковы сулугуні, адыгейскі, плаўлены, вэнджаны, з кменам, мёдам, папрыкай, кропам, мармеладам, і гэта яшчэ не поўны спіс. Цэны сапраўды ўражваюць: ад 10 да 20 рублёў (100-200 тысяч).
Нягледзячы на тое, што сыр займеў папулярнасць у Магілёўскай вобласці, колькасць вытворчасці не павялічылася. «Сырамі мы частавалі і прэзідэнта, і прадстаўнікоў ААН, і французскую дэлегацыю. Усім усё спадабалася», — кажуць фермеры. Вось нядаўна іх запрасілі ў Александрыю на «Купалле».
Сыравары сапраўды робяць смачныя і духмяныя сыры, і іх цалкам можна назваць крафтавымі. Напрыклад, Уладзіслаў Сямёнавіч робіць беларускі сулугуні. Па паходжанні ён каўказец, 25 год жыве ў Беларусі і ўжо 5 год займаецца сыраварэннем.
Усе сыравары ў адзін голас кажуць, што гатовыя вырабляць больш прадукцыі, чым цяпер. Так, яны ездзяць на мясцовыя фестывалі, але асноўны пакупнік іх знаходзіцца ў родным Слаўгарадзе.
Вытворчасць тых жа тварожных сыроў безадходная, а рэцэпт — прасцей не бывае. Для прыгатавання патрабуецца малако, соль, воцат і газавая або электрычная пліта. Па часе ж сыр робіцца каля 2 гадзін.
Пасля знаёмства з сыраварамі і іх прадукцыяй складаецца ўражанне, што ім патрэбныя дзве рэчы: грошы для пашырэння аб'ёмаў вытворчасці і добры маркетолаг. Ім неабходны чалавек, які скажа, што вашыя сыры цяпер будуць называцца крафтавымі, а прадукцыя будзе прысутнічаць у крамах і рэстаранах Мінска.
Матэрыял створаны пры падтрымцы «Borjomi Беларусь» у рамках праекта «Гастранамічныя экспедыцыі Borjomi».
Цяпер чытаюць
На Мінскім паўмарафоне памёр 50‑гадовы бягун. Вось што вядома пра Аляксея Дашыневіча22
Каментары