Былы прэм'ер-міністр, а цяпер старшыня Савета рэспублікі Міхаіл Мясніковіч выказаў паслу Туркменістана ў Беларусі Назаргулы Шагулыеву незадаволенасць з нагоды складанасцяў, з якімі сутыкаюцца беларускія рабочыя пры будаўніцтве Гарлыкскага горна-абагачальнага камбіната. Пра гэта гаворыцца ў паведамленні прэс-службы Савета рэспублікі.
Аляксандр Лукашэнка даручыў Мясніковічу яшчэ ў бытнасць прэм'ерам курыраваць будаўніцтва Гарлыкскага ГАКа ў Туркменістане. Той не адзін раз бываў на аб'екце. А днямі Мясніковіч запрасіў пасла Назаргулы Шагулыева на размову і «выказаў крайнюю занепакоенасць у сувязі з працяглым невыкананнем туркменскім бокам узятых на сябе фінансавых і іншых абавязацельстваў па рэалізацыі названага праекта».
«Было падкрэслена, што гэты фактар, а таксама шматлікія перашкоды, у тым ліку суб'ектыўнага характару, з якімі сутыкаюцца беларускія будаўнікі, негатыўна ўплываюць на ход будаўніцтва», сказана ў прэс-рэлізе.
Старшыня Савета Рэспублікі падкрэсліў неабходнасць «прыняцця Ашхабадам шэрагу неадкладных мер у мэтах паспяховага завяршэння будаўніцтва камбіната».
У студзені 2010 года «Белгархімпрам» падпісаў з дзяржаўным канцэрнам «Туркменхімія» кантракт на будаўніцтва беларускімі спецыялістамі пад ключ горна-абагачальнага камбіната па выпуску калійных угнаенняў магутнасцю 1,4 млн т у год на базе Гарлыкскага радовішча. Гэтае радовішча разведанае яшчэ ў 60-х гадах мінулага стагоддзя, але цікавасць да яго праявілі толькі нядаўна, калі ўгнаенні выраслі ў цане. Спачатку працу па свідраванні і будаўніцтве рудніка туркменскія спецыялісты спрабавалі выканаць самастойна, але, сутыкнуўшыся з шэрагам складанасцяў, заклікалі на дапамогу беларусаў. Агульная сума кантракту складае 1 млрд даляраў.
Цяпер чытаюць
Адданага ябацьку, які абражаў Святлану Ціханоўскую ў Threads, кінулі за краты14
Каментары