У Эфіопіі абвешчанае надзвычайнае становішча ў адказ на акцыі пратэсту, якія праводзяцца прадстаўнікамі дзвюх найбуйнейшых этнічных груп краіны.
Народнасці арома і амхара ўтвараюць больш за 60% насельніцтва Эфіопіі. Яны незадаволеныя тым, што кіруючая эліта ў краіне складаецца ў асноўным з прадстаўнікоў народнасці тыграі, якія прадстаўляюць усяго каля 6% насельніцтва.
Пратэсты, якія праходзяць ужо некалькі месяцаў і выліваюцца ў беспарадкі, абвастрыліся на мінулым тыдні, пасля таго як у сутыкненнях паміж паліцыяй і пратэстоўцамі загінулі 55 чалавек, якія бралі ўдзел у нацыянальным свяце арома.
Праваабаронцы заяўляюць, што ў ходзе пратэстаў апошніх месяцаў загінулі сотні іх удзельнікаў, дзясяткі тысяч страцілі свабоду.
Абвяшчаючы па тэлебачанні надзвычайнае становішча, прэм'ер-міністр Эфіопіі Хайлемарыям Дэсалень заявіў: «Мы вышэй за ўсё ставім бяспеку нашых суграмадзян. Акрамя таго, мы хочам пакласці канец той шкодзе, якая наносіцца нашай інфраструктуры — урадавым будынкам, адукацыі і ахове здароўя».
Надзвычайнае становішча абвешчанае тэрмінам на паўгода.
Цяпер чытаюць
Бабарыка расказаў, чаму перад выбарамі не шукаў падтрымкі ў Расіі. І як яго хацелі звольніць з Белгазпрамбанка за лозунг «Жыве Беларусь!»26
Бабарыка расказаў, чаму перад выбарамі не шукаў падтрымкі ў Расіі. І як яго хацелі звольніць з Белгазпрамбанка за лозунг «Жыве Беларусь!»
Максім Знак пра прэс-канферэнцыю ва Украіне: Мы дамовіліся не ўздымаць найбольш балючыя тэмы — катаванняў, санкцый, вайны. Можа, мусілі мы па-іншаму зрабіць1010
Каментары