Генеральным дырэктарам выступаючага ў Кантынентальнай хакейнай лізе мінскага «Дынама» прызначаны Анатоль Курылец, які раней займаў у клубе пасаду намесніка генеральнага дырэктара па бяспецы.
Больш за год клуб працаваў без гендырэктара — пасля таго як 20 ліпеня 2015 года быў арыштаваны Максім Суботкін, які займаў гэтую пасаду. Выконваючым абавязкі гендырэктара ў гэты час быў Павел Бурба.
18 кастрычніка 2016 года суд прысудзіў Суботкіна да пяці гадоў пазбаўлення волі па абвінавачванні ў злоўжыванні службовымі паўнамоцтвамі, перавышэнні службовых паўнамоцтваў і службовай халатнасці.
48-гадовы ўраджэнец Жыткавіцкага раёна Анатоль Курылец — былы ваенны, апошнія дзесяць гадоў перад прыходам у мінскае «Дынама» служыў у органах унутраных спраў, быў намеснікам начальніка УУС Віцебскага аблвыканкама, намеснікам міністра ўнутраных спраў Беларусі.
Як адзначыў, каментуючы клубнай прэс-службе прызначэнне Курыльца, старшыня назіральнага савета ХК «Дынама-Мінск» міністр унутраных спраў Ігар Шуневіч, разгледзеўшы розныя варыянты, назіральны савет прыйшоў да «аптымальнага рашэння — прызначыць на адказную пасаду чалавека, які мае велізарны кіраўніцкі і жыццёвы досвед».
Па словах Шуневіча, за тыя паўтара года, якія Курылец займаў пасаду намесніка гендырэктара па бяспецы, ён «паспеў паглыбіцца ва ўсе кірункі дзейнасці клуба, вывучыць унутраныя адміністрацыйныя і камерцыйныя працэсы». Кіраўнік назіральнага савета падкрэсліў, што прызначэнне Анатоля Курыльца «не прадугледжвае рэвалюцыйных змяненняў у стратэгіі развіцця клуба». «Дынама» працягне рухацца ў выбраным кірунку, дамагаючыся высокіх спартыўных вынікаў і працягваючы заставацца базавым клубам нацыянальнай зборнай», — заявіў Шуневіч.
Выконваючы абавязкі гендырэктара Павел Бурба працягне працу ў «Дынама» на пасадзе намесніка гендырэктара і будзе курыраваць спартовы кірунак, упраўненне маркетынгу і камерцыйных праектаў, а таксама прэс-службу.
Работнікам Цэнтра алімпійскай падрыхтоўкі па фрыстайле забаранілі ісці на пахаванне Мікалая Казекі15
Работнікам Цэнтра алімпійскай падрыхтоўкі па фрыстайле забаранілі ісці на пахаванне Мікалая Казекі
У Беларусі зацвердзілі правілы эвакуацыі каштоўнасцяў на выпадак вайны: цэглу з Брэсцкай крэпасці з надпісамі будуць ратаваць перш за карціны Шагала і Суціна1515
Каментары