Ліберальна-дэмакратычная партыя Беларусі прапанавала правесці у 2018 годзе адначасова з выбарамі дэпутатаў мясцовых саветаў рэферэндум па змене Канстытуцыі.
Заява пра гэта была прынятая 23 лістапада на пасяджэнні вышэйшага савета і цэнтральнага камітэта ЛДП, паведаміла прэс-служба партыі. У прыватнасці ў партыі прапануюць перайсці на выбары дэпутатаў усіх узроўняў па прапарцыйна-мажарытарнай сістэме, павялічыць тэрмін паўнамоцтваў членаў Савета Рэспублікі, дэпутатаў Палаты прадстаўнікоў Нацыянальнага сходу і дэпутатаў мясцовых саветаў з чатырох да пяці гадоў, а таксама павялічыць тэрмін паўнамоцтваў прэзідэнта з пяці да сямі гадоў.
«Гэтыя змены дадуць магчымасць умацаваць палітычную сістэму Рэспублікі Беларусь, прывядуць да далейшай дэмакратызацыі і развіцця грамадзянскай супольнасці, умацавання ўлады ў краіне», — лічаць у ЛДП.
Прасоўваць ідэю рэферэндуму партыя мае намер, «карыстаючыся сваім прадстаўніцтвам у Савеце Рэспублікі і Палаце прадстаўнікоў» — мандаты дэпутата і члена Савета Рэспублікі маюць адпаведна намеснік старшыні партыі Анатоль Хішчэнка і старшыня Сяргей Гайдукевіч.
Апошні рэферэндум па змене Асноўнага закона адбыўся 17 кастрычніка 2004 года з ініцыятывы Аляксандра Лукашэнкі. Паводле яго афіцыйных вынікаў было адмененае абмежаванне колькасці прэзідэнцкіх тэрмінаў для аднаго чалавека.
7 кастрычніка Лукашэнка заявіў, што не выключае карэктавання Канстытуцыі ў адпаведнасці з выклікамі часу. «Свет імкліва мяняецца. Мы павінны адаптавацца да зменных умовах, каб не толькі не страціць занятыя намі нішы, але і знайсці новыя. Магчыма, наспеў час правесці і аналіз нашага Асноўнага закона, я ўжо неяк пра гэта казаў. Паспрабуем падысці да гэтага пытання з розных бакоў. Акуратна, каб не зрабіць горш. З'явіліся новыя праблемы, выклікі. Дый час, напэўна, патрабуе чагосьці новага. І пачынаць трэба з галоўнага, калі мы адважымся на гэта. Нам трэба стварыць групу мудрацоў, юрыстаў, якія прааналізуюць Асноўны закон. І калі трэба будзе, мы на гэта пойдзем», — сказаў афіцыйны лідар на сустрэчы з парламентарыямі старога і новага склікання.
Па падазрэнні ў забойстве цяжарнай мінчанкі затрымалі хакейнага суддзю Аляксея Гаўрылёнка6
Каментары