У Віцебску супрацоўнікі ДПС ДАІ затрымалі п'янага кіроўцу, які ўчыніў ДТЗ. Відэа затрымання з'явілася ў сацыяльнай сетцы Укантакце, піша Еўрарадыё.
У каментары БелТА часовы выканаўца абавязкаў начальніка аддзялення агітацыі і прапаганды ДАІ УУС Віцебскага аблвыканкама Аляксандр Казючыц распавёў падрабязнасці інцыдэнту.
Здарэнне адбылося 3 снежня ў 13.45 па вуліцы Зеленагурскай. Аўтамабіль «Форд», за рулём якога быў 28-гадовы жыхар Віцебска, урэзаўся ў прыпынак грамадскага транспарту. На шчасце, на самім прыпынку падчас ДТЗ нікога не было.
Відавочцы здарэння выклікалі нарад ДАІ, а таксама спынілі аўтамабіль хуткай дапамогі, які праязджаў міма. Да інспектараў ДАІ кіроўца «Форда» выйшаў голым. «Ці быў ён у такім стане за рулём, нам пакуль не вядома. Яго адзенне выяўленае на вуліцы. Мужчыну затрымалі і даставілі ў аддзел», — удакладніў Казючыц.
У міліцыі пакуль не кажуць, ці ўсведамляў свае дзеянні затрыманы кіроўца. Таксама не паведамляецца, ці быў ён у стане алкагольнага ап'янення або пад уздзеяннем псіхатропаў.
Па факце ДТЗ праводзіцца праверка.
Каментары