Часопіс Bulletin of Atomic Scientists перасунуў стрэлку Гадзінніка Суднага дня на 30 секунд наперад з-за выказванняў Дональда Трампа і распаўсюджвання нацыяналізму ў свеце. Аб гэтым паведамляецца на сайце выдання.
На думку экспертаў, напружанасць у свеце павялічылася з-за выказванняў Трампа аб выкарыстанні і распаўсюдзе ядзернай зброі і яго грэбавання праблемамі кліматычных змяненняў. Акрамя таго, прычынай стаў рост нацыяналістычных настрояў па ўсім свеце.
Зараз гадзіннік знаходзіцца за 2,5 хвіліны ад глабальнай катастрофы.
Апошні раз так блізка да яе свет знаходзіўся ў 1984 годзе, калі адбылася эскалацыя гонкі ўзбраенняў паміж Расіяй і ЗША. Тады гадзіннік паказваў без трох хвілін апоўнач. Бліжэй за ўсё да апоўначы гадзіннік знаходзіўся ў 1953 годзе. Ён паказваў 23:58, бо ЗША і СССР выпрабавалі першыя тэрмаядзерныя бомбы.
Гадзіннік Суднага дня быў прыдуманы часопісам Чыкагскага універсітэта Bulletin of Atomic Scientists. Упершыню ён з'явіўся на вокладцы часопіса ў 1947 годзе, калі ЗША выпрабавалі ядзерную бомбу.
Час да 00:00 азначае напружанасць міжнароднай абстаноўкі ў свеце і развіццё ядзернай зброі. Чым бліжэй стрэлка да 00:00, тым бліжэй свет да глабальнай катастрофы. Наколькі і ў які бок перасунуць стрэлку вырашае рада дырэктараў часопіса і запрошаныя эксперты, у прыватнасці лаўрэаты Нобелеўскай прэміі.
Падчас перадвыбарчай кампаніі Трамп заяўляў пра магчымасць выкарыстоўваць ядзерную зброю супраць тэрарыстаў. У снежні ён пісаў у сваім твітэры, што неабходна «значна ўзмацніць і пашырыць ядзерныя магчымасці» ЗША.
Цяпер чытаюць
«Мае спінагрызы са мной». Ціханоўская расказала, што ўжо выбірае для дзяцей школу ў Варшаве12
Каментары