Максім Мірны ляжыць пад кропельніцай у 4‑й гарадзкой клінічнай бальніцы Менску, чытае кнігі па прыватным праве й, нягледзячы на забароны дактароў, робіць шпагаты на падлозе.
У мінулую нядзелю і Макс Мірны, і Валодзя Ваўчкоў не змаглі выйсьці на корт у матчы Кубка Дэвіса з палякамі. Сьцісла паведамілі: вірусная інфэкцыя. Злыя языкі сталі цьвердзіць, што спартоўцы кепска падрыхтаваныя, але далейшыя падзеі паказалі, што ўсё значна горш, чым меркавалася.
Макса тэрмінова шпіталізавалі ў бальніцу, дзе паклалі пад кропельніцу. Валодзю прапісалі стацыянарнае лячэньне. Што за вірус паразіў абодвух тэнісістаў — да апошняга часу не было вядома.
Учора карэспандэнт «Е» паспрабаваў гэта высьветліць.
— Я толькі што ад Макса, — расказвае бацька Максіма Мірнага Мікалай Мікалаевіч. — Лекары сказалі, што інфэкцыя дала ўскладненьне на ныркі, але да нэфрыту (востры нэфрыт можа ўзьнікнуць пасьля перанесенай інфэкцыйнай хваробы — С.Б.), слава Богу, справа не дайшла. Аналізы паляпшаюцца, зьмяншаецца бялок. Аналізы бяруць па некалькі разоў на дзень, але раней, паводле слоў дактароў, яны былі вельмі кепскімі. Думаю, вам будзе цікавы такі факт: учора (22 ліпеня — С.Б.) лекары засьпелі сына на падлозе. Ён займаўся расьцяжкай. Быў жудасны скандал. Максу сказалі, што такое самакатаваньне яны бачаць упершыню. Чалавеку ў ягоным становішчы трэба было падключаць штучную нырку, а ён займаецца на падлозе гімнастыкай. Інфармацыя пра штучную нырку мяне, вядома, вельмі перапужала, але ўжо сёньня стан сына пачаў паляпшацца. Нармалізавалася тэмпэратура, зьнешне Максім пачуваецца о’кей.
— Якая была самая высокая тэмпэратура?
— Трое сутак запар трымалася 38,5. Прычым у першы дзень ніякіх прыкметаў тэмпэратуры не было. Вызначыў яе толькі доктар. Гэта было ў суботу, калі тэнісісты выйшлі на корт, але пачаўся дождж. Дарэчы, цяпер і кажуць, што інфэкцыя магла зьявіцца ад пераахалоджваньня. Ці гэта праява рэцыдыву. Акрамя таго, у Вовы Ваўчкова да гэтага хуткая забрала дзіцё з прастудным захворваньнем. Так што не выключаю й таго, што вірус перадаўся ад Валодзі. Плюс да гэтага пасьля выступу ў першы дзень у «адзіночцы» Макс, каб узнавіцца хутчэй, паскакаў з гарачага душу ў халодны басэйн. Усё гэта й прывяло да бальніцы. Цяпер Макс пад кропельніцай. Увосень у сына абарона дыплёму (ён — будучы юрыст‑міжнароднік), так што я яму прынёс падручнікі па прыватным праве. Хай чытае, калі ўжо ёсьць вольны час.
У Валодзі Ваўчкова менш цяжкае становішча, але ягоная мама Людміла Станіславаўна лічыць, што ўсё гэта — ад нэрвовых перагрузак:
— Я колькі разоў казала сыну, каб ён кідаў вялікі спорт. І калі сказаў, што трэба сыходзіць, дык сыходзь. Сілы‑та не бясконцыя. Нэрвовае напружаньне вялікае, арганізм дае сбой. Іншая справа, што Вова заўжды быў патрыётам сваёй краіны і пра сваё здароўе думае менш за ўсе.
— Максім Мірны на самой справе захварэў на вірусную інфэкцыю, і хвароба працякала дастаткова цяжка. Прычым сымптомы інфэкцыі зьявіліся і ў Макса, і ў Валодзі, хоць апошняга вырашылі не шпіталізаваць. Пакуль мы ня можам высьветліць, што гэта за вірус. Усё ў працэсе дыягностыкі. Думаю, цягам наступных дзён карціна будзе зразумелая. Але становішча стабілізуецца, першыя надзеі зьявіліся. А на сёньняшні дзень мы маем тры факты. Тое, што ў суботу абодва тэнісісты захварэлі. Тое, што ў нядзелю абодва не гулялі. І тое, што ў панядзелак Макса шпіталізавалі, таму што інфэкцыя працягвала разьвівацца.
— Хвароба сапраўды дала Максіму Мірнаму ўскладненьне на ныркі?
— Так, і менавіта таму ён цяпер ляжыць ва ўралягічным аддзяленьні. А ўвогуле пра наступствы варта будзе гаварыць пасьля заканчэньня вострага пэрыяду хваробы. Такі пэрыяд займае ад 7 да 21 дня. Пакуль мы рэкамэндавалі Максу ўстрымацца ад любых кантактаў. Яму трэба адужэць. Да таго ж любая інфэкцыя мае ўласьцівасьць перадавацца. Так што гутарыць з тэнісістам пакуль небясьпечна.
Цяпер чытаюць
Агентка Кардаш выкарыстоўвала сэкс, каб збіраць інфармацыю пра каліноўцаў і завербаваць украінскага камандзіра. А куратару КДБ пісала пра яго: «Мой лох»3535
Каментары