«Пашпарт ДНР» у Беларусі: ці можна зняць гатэль, арандаваць аўто, набыць сім-картку?
Афіцыйна пашпарты «ДНР» і «ЛНР» у Беларусі не прызнаныя. Па вялікім рахунку, іх уладальнікаў памежнікі ўвогуле не павінны пускаць у краіну. Аднак з такім пашпартам можна заехаць праз Расію, таксама могуць прапусціць праз беларускую мяжу «ў залежнасці ад жыццёвай сітуацыі».
Але ж ці зможа «госць з Данбасу» афіцыйна замовіць сабе гатэль? Набыць сім-карту?
Па тэлефоне, які пазначаны для кансультацый, спецыялістка МТС на пытанне, ці не ўзнікнуць праблемы, адказаць не змагла. Паведаміла, што ўдакладніць і дашле паведамленне праз пэўны час. Цягам паўгадзіны прыйшла смс ад службы даведкі МТС: «Для падключэння на тарыфны план «Смарт Гасцявы» можаце звярнуцца ў офіс з вашым пашпартам».
Спецыялісты і «Вэлком», і «Лайф» адказалі прыкладна аднолькава — так, падыходзьце, падключайцеся, без праблем.
«Калі пашпарты дзейсныя і афіцыйныя, замежныя грамадзяне могуць здзейсніць падключэнне», — запэўніла спецыялістка «Вэлком».
Пашпарт ДНР яе не засмуціў ані разу.
Але пасля просьбы спраўдзіць інфармацыю высветлілася, што не ўсё так проста.
«Прабачце, але з-за нейкіх там юрыдычных момантаў падключыцца з такім пашпартам нельга», — адказала кансультантка Лайф.
Такім чынам, дакладна незразумела, што будзе, калі прыйсці з «дэнээраўскім» пашпартам ў абаненцкі цэнтр мабільнага аператара. Здаецца, можа і пракаціць.
З жыллём, аднак, будуць праблемы.
«Прэзідэнт-гатэль». Шанцаў засяліцца няма. Адказ ветлівы, але кароткі: «Прабачце. Але такі пашпарт мы не прымаем».
Гатэль «Мінск» — таксама не для «апалчэнцаў». «Пашпарты «ДНР» і «ЛНР» у Беларусі не прызнаныя. Засяліцца вы не зможаце», — паведаміла адміністратарка.
Ветлівы менеджар гатэля «Рэнесанс» распавёў наступнае:
«Я думаю, што калі вас пусцілі ў краіну, то праблем не будзе. Калі вы нармальна праехалі праз мяжу па гэтым дакуменце, то праблем пры засяленні не ўзнікне».
Гатэль эканом-класа «Экспрэс» на чыгуначным вакзале — таксама не выйсце.
«ДНР»? А што гэта? Данецкая народная рэспубліка? Ой, не ведаю… Напэўна, не засялю. Яшчэ няма ў нас такога», — адказала адміністратарка.
А што з машынай? Ці можна ўзяць аўто ў арэнду?
Кампанія «Аўто-гуд» адмаўляе адразу: «Пашпарты «ДНР» не прымаем. Яны дзейсныя толькі ў Расіі».
Сэрвіс «Дрым-карс» грамадзяніну «ДНР» машыну без кіроўцы даваць адмовіўся. Але калі замовіць кіроўцу, то праблем не ўзнікне, запэўнілі ў кампаніі, нягледзячы на тое, што для такой паслугі таксама патрэбен пашпарт.
У сэрвісе з мілагучнай назвай «Пчолка Мая» падбадзёрылі — праблем не будзе.
«Каб арандаваць аўто, патрэбен пашпарт, на якім вашае фота, пераклад імя і прозвішча на англійскую. Калі пашпарт дакладна ваш, то ўсё будзе нармальна».
Цяпер чытаюць
На пратэстанцкі фестываль у «Чыжоўку-Арэну» едзе амерыканскі прапаведнік Франклін Грэм. Разам з ім чакаюць Коўла з жонкай19
Каментары