Фотаздымкі аголеных салдатак выклікалі скандал у Марской пяхоце ЗША
Крымінальная следчая служба флоту ЗША завяла справу ў сувязі са з'яўленнем у інтэрнэце эратычных фота жанчын, якія служылі ў марской пяхоце ці былі сяброўкамі марскіх пехацінцаў, піша афіцыйны партал marinecorpstimes.com.
Гучны скандал узрушыў амерыканскія СМІ днямі, калі была прыцягнутая ўвага да суполкі Marines United на Facebook, якая цяпер ужо заблакаваная.
У суполцы больш за 20 000 былых і сучасных амерыканскіх і брытанскіх марпехаў дзяліліся сваімі гісторыямі і праблемамі, а таксама фотаздымкамі часоў сваёй службы, у тым ліку ню-здымкамі сваіх былых каханак, што часта суправаджалася непрыстойнымі і абразлівымі каментарамі.
Цяпер колькасны склад Корпуса марской пяхоты ЗША — больш за 220 000 чалавек. Агульная колькасць ветэранаў-марпехаў у ЗША — каля 3 млн.
Увагу журналістаў і следчых прыцягнулі не толькі абразы ў бок салдатак і непрыстойныя паводзіны салдатаў, але і тое, што часам называліся сапраўдныя імёны жанчын, якія потым атрымлівалі навязлівыя лісты і паведамленні сэксуальнага характару.
Афіцыйныя прадстаўнікі Марской пяхоты заявілі пра сваю занепакоенасць сітуацыяй і заклікалі ахвяр падобнага пераследу звяртацца да следчых органаў. Асудзілі паводзіны ўдзельнікаў суполкі дэпутаты абодвух партый і Пентагона.
Пакаранне за падобныя дзеянні можа быць вельмі суровым у залежнасці ад таго, ці служаць ахвяра і злачынца цяпер у войску (ад гэтага будзе залежаць тое, па якіх законах будуць судзіць) і ступені жорсткасці пераследу.
Сітуацыя стала прадметам вельмі актыўнага абмеркавання ў сацыяльных сетках і на старонках вайсковых СМІ ЗША.
Каментары