У Беларусі плануецца спрасціць працэдуру будаўніцтва індывідуальнага жылля, паведаміў сёння журналістам намеснік міністра архітэктуры і будаўніцтва Дзмітрый Семянкевіч на выстаўцы «Будэкспа-2017», каментуючы прапановы, якія накіраваны ў Адміністрацыю прэзідэнта рабочай групай па стымуляванні дзелавой актыўнасці, выключэнні залішніх патрабаванняў да суб'ектаў гаспадарання, удасканаленні кантрольна-нагляднай дзейнасці ў будаўнічай сферы, перадае БЕЛТА.
«Мы прапанавалі спрасціць працэдуру па будаўніцтве фізічнымі асобамі індывідуальнага жылля. Так, прадугледжваецца, што ў існуючым жыллёвым фондзе прымаць рашэнне па ўсіх пытаннях будзе галоўны архітэктар раёна: і па размяшчэнні аб'ектаў, і па пытаннях пажарнай і санітарнай бяспекі, і іншых. Новае жыллёвае будаўніцтва будзе ажыццяўляцца па горадабудаўнічых пашпартах. Чалавек не павінен ведаць усе патрабаванні жыллёвага кодэкса, будаўнічых стандартаў. У яго будзе горадабудаўнічы пашпарт, у якім будуць дакладна прапісаны ўсе яго правы і абавязкі», — адзначыў Дзмітрый Семянкевіч.
Паводле яго слоў, горадабудаўнічы пашпарт будзе ўручаць выканкам на аўкцыёне або проста пры прадастаўленні ўчастка.
«Такім чынам, мы пазбегнем вялікай колькасці працэдур, калі людзі за будаўніцтвам навеса вымушаны праседжваць чэргі ў выканкамах, атрымліваючы на яго дазволы», — растлумачыў намеснік міністра.
Каментары