Пяць фактаў пра новага прэс-сакратара МЗС, які хамаватасцю косіць пад Марыю Захараву
Руслан Варанкоў, які адзначыўся крынжовым падарункам у Маскве — падарыў Захаравай сякеру, ужо некалькі месяцаў працуе прэс-сакратаром МЗС Беларусі. «Салідарнасць» паглядзела, якія ў яго біяграфіі ёсць цікавыя старонкі.
У пачатку чэрвеня Руслан Варанкоў падарыў сякеру-калун вытворчасці МТЗ прадстаўніцы расійскага МЗС Марыі Захаравай. Маўляў, такім чынам, яны разам будуць «секчы праўду-матку».
Трэба адзначыць, што пасыл не ацанілі нават у каментарах на старонцы беларускага МЗС у Facebook. Напрыклад, там апублікавалі наступную ілюстрацыю.
Магчыма, вы маглі прапусціць, што ў Беларусі нядаўна змяніўся прэс-сакратар МЗС: у пачатку красавіка Руслан Варанкоў змяніў Анатоля Глаза, адпраўленага паслом у Турцыю.
Вось што вядома пра біяграфію новай асобы ў беларускім замежнапалітычным ведамстве.
Скончыў ліцэй у Магілёве
Гэта вынікае з інфармацыі, размешчанай Русланам Варанковым у Facebook. У абласным цэнтры ёсць некалькі ліцэяў, які менавіта ён скончыў — не ўдакладняецца. Нядаўна ў гонар Міжнароднага дня сям'і дыпламат падзяліўся сваёй фатаграфіяй з бацькамі.
У 2001-2006 гадах Варанкоў вывучаў міжнароднае права ў БДУ, валодае англійскай і французскай мовамі. У 2007-2008 гадах працаваў у міністэрстве юстыцыі, пасля перайшоў у МЗС.
Аблом з прызначэннем генеральным консулам у Нью-Ёрк
Некаторы час Варанкоў прапрацаваў дарадцам і юрысконсультам у Пастаянным прадстаўніцтве Беларусі пры ААН у Нью-Ёрку, адказваючы, у прыватнасці, за юрыдычныя і бюджэтныя пытанні, а таксама за барацьбу з тэрарызмам. Быў абраны старшынёй Спецыяльнага камітэта па статуце ААН.
Затым дыпламат заняў пасаду намесніка начальніка ўпраўлення Азіі, Аўстраліі і Акіяніі МЗС.
У ліпені 2021 года ў кар'еры Варанкова адбылася, як тады здавалася, знамянальная падзея. Лукашэнка прызначыў яго генеральным консулам у Нью-Ёрк.
Ужо ў кастрычніку на патрабаванне амерыканскіх уладаў Генеральнае консульства Беларусі ў Нью‑Ёрку было закрытае. Адносіны дзвюх краін перажывалі чарговы крызіс са скарачэннем дыпламатычнай прысутнасці.
Удзел у арышце «каліноўца» Верамейчыка
Восенню 2024 года ў Хашыміне быў затрыманы і выдадзены беларускаму КДБ былы баец палка Каліноўскага Васіль Верамейчык. Наўрад ці ў баку ад той аперацыі мог застацца Руслан Варанкоў.
Справа ў тым, што вясной 2022 года пасля няўдалай працы ў Нью-Ёрку ён быў прызначаны генеральным консулам Беларусі якраз у Хашыміне, найбуйнейшым горадзе В'етнама (раней вядомым як Сайгон).
Не хавае жонкі
Дарэчы, падчас працы генеральным консулам у Хашыміне Варанкоў некалькі разоў удзельнічаў з жонкай у публічных мерапрыемствах. Напрыклад, у фестывалі традыцыйнага в'етнамскага касцюма аазай.
А таксама ў святкаванні месяцовага Новага года, падчас якога муж і жонка надзелі аазай і выпусцілі карпаў у сажалку.
Варанкоў пераймае скандальны стыль Захаравай
У пачатку красавіка гэтага года дыпламата чакала павышэнне да прэс-сакратара МЗС Беларусі. У ведамстве Варанкова назвалі «дыпламатам з вялікім вопытам і ўражлівым паслужным спісам».
Падарунак Марыі Захаравай у выглядзе сякеры не выпадковы.
Прыкметна, што Варанкоў, як і яго папярэднік Анатоль Глаз, арыентуецца на «трамвайны» стыль расійскіх дыпламатаў — абразлівы і агрэсіўны. Такім чынам дыпламаты бяруць на сябе яшчэ і функцыю прапагандыстаў для ўнутранай аўдыторыі.
Прыклады? 10 красавіка ў паведамленні МЗС Беларусі было заяўлена, што анкеты для людзей, якія ўязджаюць з краін СНД у Латвію — гэта «нібы сярэднявечны каранцін», а ў Эстоніі нібыта ёсць «выбарчы апартэід» (там забаранілі галасаваць на мясцовых выбарах грамадзянам Беларусі і РФ).
23 траўня Варанкоў паабяцаў змрочную будучыню еўрапейцам з-за мытаў на беларускі імпарт, узгадаўшы выказванне «на злосць маме вушы адмарозяць».
Цалкам магчыма, Варанкоў мае намер пераплюнуць у хамстве свайго папярэдніка Анатоля Глаза.
Цяпер чытаюць
Лукашэнка заклікаў жыхароў Гомельшчыны не хвалявацца з-за ўльтыматуму Зяленскага адносна рэтранслятараў22
Каментары