На платформе «Талака» ідзе збор сродкаў на пераклад выбітнай кнігі па псіхатэрапіі Альфрыда Лэнгле - «Сляды сэнсу. Даць адказ жыццю».
Хто такі Альфрыд Лэнгле?
Альфрыд Лэнгле - аўстрыйскі псіхатэрапеўт, вучань і паплечнік Віктара Франкла, адзін з заснавальнікаў логатэрапіі і экзістэнцыяльнага аналізу.
Кнігі Альфрыда Лэнгле перакладзеныя на шматлікія мовы свету.
Кніга «Сляды сэнсу. Даць адказ жыццю» знаходзіцца на памежжы спецыяльнай і мастацкай літаратуры. У форме паэтычных занатовак аўтар уводзіць чытача ў сферу пытанняў і паняццяў, на базе якіх выбудоўваецца праца ў межах экзістэнцыяльнага аналізу і логатэрапіі.
Сэнс, адказнасць, страх, пакуты — вось толькі некаторыя з ключавых паняццяў, якія закранаюцца ў кнізе. Аўтар не дае рэкамендацый, але задае пытанні, якія дапамагаюць уважліва паглядзець на ўласную сітуацыю ў гэтым свеце: што адбываецца са мною, калі я жыву?
«У нашым грамадстве, якое пабудавана на іерархіях, чалавек часта далёка ад самога сябе, не ўсведамляе сябе, —
кажа перакладчыца кнігі на беларускую Ірына Герасімовіч. Таму такая кніжка мне падаецца вельмі актуальнай і для шырокай публікі. Для псіхатэрапеўтаў і псіхолагаў: яна мае настроіць кліента на пэўную хвалю, неабходную для якаснага ўзаемадзеяння падчас кансультацыі».
Кніга, лічаць выдаўцы, будзе карысная усім, хто зацікаўлены ў свядомым і адказным пражыванні ўласнага жыцця.
Падтрымаць кнігу можна на платформе Талака.
Фрагменты кніжкі ёсць на сайце выдавецтва «Галіяфы».
Каментары