У Казахстане ўзяты пад варту толькі што звольнены міністр абароны Руслан Жаксылыкаў, якога прэзідэнт Касым-Жамарт Такаеў нечакана звольніў у мінулую нядзелю з пасады.
Жаксылыкаў затрыманы і змешчаны пад варту ў следчым ізалятары ў Астане, паведамляе Расійская служба Радыё Свабода.
Падрабязнасці затрымання не выдаюцца ў адпаведнасці з палажэннямі Крымінальнага кодэкса Казахстана.
Паводле інфармацыі крыніц Elmedia, затрыманне зрабіў Камітэт дзяржаўнай бяспекі Казахстана. «Мяркуем, што гэта неяк звязана з крадзяжамі», — удакладніла крыніца.
Жаксылыкаў, які раней займаў пасаду намесніка міністра ўнутраных спраў і камандуючага Нацыянальнай гвардыяй, быў прызначаны міністрам абароны Казахстана пасля студзеньскіх падзей 2022 года, калі масавыя пратэсты, выкліканыя адменай цэнавай столі на паліва, перараслі ў маштабныя беспарадкі.
Для іх падаўлення ўладам давялося звярнуцца па дапамогу да войскаў Арганізацыі Дамовы аб калектыўнай бяспецы (АДКБ), у Казахстан былі накіраваныя вайсковыя падраздзяленні Расіі.
У публікацыях, прысвечаных дзейнасці Жаксылыкава на пасадзе міністра, нярэдка адзначалася, што ў апошнія гады ў Казахстане рэзка пачасціліся выпадкі прымусовага прызыву ў войска на тэрміновую службу.
Прычына звальнення Жаксылыкава афіцыйна не паказвалася.
Цяпер чытаюць
Закінутую сядзібу Багдановічаў пераробяць у буціковы гатэль ФОТЫ4
Каментары