У нядзелю 27 жніўня на салігорскім стадыёне «Будаўнік» адбыўся матч лідараў чэмпіянату краіны па футболе «Шахцёра» і БАТЭ. Барысаўская каманда атрымала звышупэўненую перамогу з лікам 4:0.
Аднак гульня запомніцца не толькі лікам, але каляфутбольнымі момантамі. Ужо па сканчэнні матча кіраўнік футбольнага клуба БАТЭ Анатоль Капскі ўключыў у раздзявальні сваёй каманды хіт гурта «Ленінград» «Ехай на…уй».
Прычым не проста ўключыў, але яшчэ і адмыслова адчыніў дзверы і на відэа вымавіў: «Гэта Хахлову».
Дзмітрый Хахлоў — менеджар салігорскага «Шахцёра». Грамадзянін Латвіі Хахлоў прыйшоў у «Шахцёр» з «Вентспілса» ў гэтае міжсезонне, ён адказвае ў клубе за трансферную палітыку.
«Вось знайшоўся ў «Шахцёры» адзін дзеяч (Дзмітрый Хахлоў) — вялікі аматар гурта «Ленінград», — які прыехаў да нас з Прыбалтыкі і пачаў усіх вучыць, як трэба працаваць у беларускім футболе. Ну, няхай паслухае — гэта яму персанальны адказ. Я сам чалавек гарачы і завадны, але каб так абразліва паслаць на ўсю краіну, як пасылае «Ленінград», — такога сабе не дазваляў. Хлопцы прыдумалі лепш за мяне, як адзначыць перамогу», — сказаў Капскі ў інтэрв’ю газеце «Прессбол».
На працягу амаль усяго чэмпіянату «Шахцёр» лідзіраваў у чэмпіянаце Беларусі. Пасля гэтага паражэння ад БАТЭ каманда саступіла лідарства мінскаму «Дынама». БАТЭ ідзе толькі трэцім.
У жніўні Анатоль Капскі пакінуў пасаду генеральнага дырэктара завода БАТЭ, цяпер ён засяроджаны толькі на футболе.
Цяпер чытаюць
«Месячны плацеж пацягне на 340 рублёў». Што будзе ў Беларусі з мабільным інтэрнэтам?12
Каментары