Прэзідэнт Украіны Пятро Парашэнка заяўляе, што ЗША падтрымалі прапанову Украіны аб увядзенні міратворцаў на Данбас. Пра гэта ён сказаў 21 верасня ў ЗША на брыфінгу пасля сустрэчы з амерыканскім прэзідэнтам Дональдам Трампам, паведамляе УП.
Парашэнка сказаў, што «вельмі задаволены» сустрэчай з усёй уладнай камандай ЗША, якая доўжылася каля гадзіны.
«Важная пазіцыя, Злучаныя Штаты Амерыкі цалкам падтрымалі прапановы Украіны, мае прапановы, якія былі агучаныя яшчэ ў 2015 годзе, па размяшчэнні на ўсходзе Украіны, на акупаванай тэрыторыі, міратворцаў з мандатам Рады Бяспекі ААН», — сказаў прэзідэнт Украіны.
«Я падкрэсліваю і адзначаю: украінскай пазіцыі, якая прадугледжвае мандат на ўсю акупаваную тэрыторыю на усходзе Украіны, уключаючы некантраляваны ўчастак украінска-расійскай мяжы, што выключыць пранікненне войскаў і ўзбраення Расіі і сапраўды будзе служыць мэце міру», — адзначыў Парашэнка.
Парашэнка адзначыў некалькі ключавых момантаў сустрэчы, у прыватнасці тое, што бакі абмеркавалі пытанні ў сферы бяспекі.
«Надзвычай важна, гэта агульнае бачанне новай якасці супрацоўніцтва ў сферы бяспекі паміж Украінай і ЗША. Мы падрабязна абмеркавалі ўсе кірункі пашырэння гэтага супрацоўніцтва, пачынаючы ад супрацоўніцтва з ваеннай акадэміяй West-Point… і завяршаючы супрацоўніцтвам з Мінабароны ЗША і іншымі інстытутамі», — сказаў кіраўнік Украіны.
Парашэнка таксама адзначыў, што гаворка ішла і аб супрацоўніцтве ў эканамічнай сферы, і сказаў, што адчуў «поўную і вельмі магутную падтрымку рэформаў ва Украіне і пазітыўную ацэнку намаганняў украінскай улады».
Каментары