Мінчанін на вачах у суседзяў закалоў віламі кацяня і закапаў яго яшчэ жывым. Шакаваныя відавочцы выклікалі міліцыю. Няшчасную жывёлінку дасталі на святло і адвезлі ў ветклініку, аднак было ўжо позна… Папярэдні дыягназ — пералом пазваночніка, унутраны крывацёк, удар унутраных органаў. Жудаснае здарэнне апісвае сайт sb.by.
— У суботу я чакаў знаёмага, таму пазіраў у акно другога паверха на кальцавую, — Генадзь, жыхар вуліцы Расонскай вёскі Цна, прыкметна хвалюецца, дагэтуль перажывае тое, што здарылася. — Убачыў, як сваяк суседа па катэджным пасёлку зайшоў у хлеў з віламі. А калі выйшаў… на зубцах вілаў мяўкала і круцілася маленькае рудое кацянятка. Я закрычаў: «Што вы робіце?!» Не звяртаючы на мяне ўвагі, сусед аднёс кацяня да мяжы ўчастка, скінуў на зямлю, потым схадзіў па рыдлёўку і закапаў.
Генадзь выклікаў міліцыю. Супрацоўнікі Савецкага РУУС Мінска прымусілі суседа адкапаць жывёлу. Кацяня яшчэ дыхала і мяўкала. Яго паклалі на ганак. Па патрабаванні Генадзя жывёлу адвезлі ў ветэрынарную клініку, аднак выратаваць яго не ўдалося.
Ветэрынар зрабіў фатаграфіі няшчаснай жывёлінкі і перадаў іх супрацоўнікам міліцыі. Ён запэўніў таксама, што да забойства кацяня было абсалютна здаровым.
Па словах Генадзя, чалавек, які так жорстка расправіўся з жывёлай, не адчуваў ніякага раскаяння — наадварот, бравіраваў свой учынак і нават пагражаў яму. Пагрозы паступаюць і цяпер, таму мужчына быў вымушаны звярнуцца ў міліцыю з яшчэ адной заявай.
— Матэрыялы праверкі па факце жорсткага абыходжання з жывёлай знаходзяцца ў РУУС Савецкага раёна. Па выніках яе будзе дадзена прававая ацэнка дзеянням мужчыны, — коратка адказала Аляксандра Папова, афіцыйны прадстаўнік ГУУС Мінгарвыканкама.
— Адказнасць за жорсткае абыходжанне з жывёламі прадугледжаная Адміністрацыйным і Крымінальным кодэксамі. Для крымінальнай адказнасці неабходна наяўнасць адной з чатырох прыкмет: хуліганскія або ганебныя матывы, карыслівыя мэты, а таксама ўчыненне злачынства ў прысутнасці заведама малалетніх, — растлумачыў Яўгенія Кабакова, адвакат спецыялізаванай юрыдычнай кансультацыі № 2 МДАК. — Калі ні адна з гэтых прыкмет не будзе ўгледжана, наступіць адміністрацыйная адказнасць, якая цягне накладанне штрафу ад 10 да 30 базавых велічынь або адміністрацыйны арышт.
Цяпер чытаюць
Коўл Лукашэнку: Табе трэба быць больш асцярожным, за сталом кепскіх пацаноў застаўся адзін ты10
Каментары