Топ-5 кніг па-беларуску, ад якіх на канікулах не змогуць адарвацца і школьнікі, і дарослыя
Зайздросцім школьнікам, якія адправіліся на законныя восеньскія канікулы і прапануем не расслабляцца: самы час дабрацца да кніжак, на якія раней не хапала часу.
Прапануем топ-5 захапляльных кніг, ад якіх не змогуць адарвацца ні школьнікі, ні іх бацькі. А лепш чытайце іх разам. Сямейныя чытанні збліжаюць.
«Чытанка для маленькіх 2» (укладальнік Анатоль Івашчанка)
Зборнік, у якім можна сустрэць як народныя казкі («Каток — залаты лабок», «Пшанічны каласок), так і вершы класічных і сучасных аўтараў: Андрэя Хадановіча, Ларысы Геніюш, Артура Вольскага і іншых. Кожная старонка кнігі аздобленая вялікімі каляровымі ілюстрацыямі, а ўжо пасля першага прачытання дзеці звычайна хорам цытуюць: «Вожык лапкамі туп-туп! Вожык вочкамі луп-луп!». Зборнік падыходзіць як для дашкольнікаў, так і для вучняў малодшых класаў.
Андрэй Хадановіч: «Нататкі таткі»
«Калі паэт зрабіўся татам,
Жыццё адразу стала святам,
І ён абрадаваўся гэтак,
Што кніжку напісаў для дзетак.»
Калі ты паэт, і ў цябе падрастае дачушка, няпроста стрымацца і не пачаць пісаць для дзяцей. Вось і Андрэй Хадановіч выдаў зборнік дзіцячых вершаў, галоўнай гераіняй якога стала яго дачка і натхняльніца Аленка. Вершы апісваюць вясёлыя і знаёмыя выпадкі з жыцця, калі мама не мяняе боршч на цукеркі, тата прымушае чысціць зубы, а дзяцей цікавяць найважнейшыя пытанні: чаму шкарпэтка не шкарпятка і чаму агуркі калючыя. Усё гэта напісана вельмі дасціпна і з гумарам.
Андрэй Жвалеўскі, Яўгенія Пастэрнак: «Гімназія №13»
Беларускія аўтары Андрэй Жвалеўскі і Яўгенія Пастэрнак пішуць для падлеткаў па-руску, але яны марылі, каб іх творы пабачылі свет і на беларускай мове. За сем гадоў рускае выданне кнігі «Гімназія №13» вытрымала пяць перавыданняў, і цяпер, дзякуючы перакладу Раісы Баравіковай, з кнігай могуць пазнаёміцца і беларускія школьнікі. Паводле сюжэту, некалькі мінскіх сямікласнікаў апынаюцца замкнёнымі ў сваёй гімназіі і разумеюць, што трапілі ў паралельны свет, населены незвычайнымі істотамі: катамі, якія размаўляюць, дамавымі, багамі. Школьнікам трэба праявіць кемлівасць і ўменне дзейнічаць у камандзе, каб вярнуцца ў сваю рэальнасць. Тут і прыгоды, і гісторыі кахання, і сяброўства, і падарожжа ў свет легенд і міфаў — карацей, ставім упэўненую падабайку.
Клайв Стэйплз Льюіс: «Хронікі Нарніі. Пляменнік чараўніка»
Класіка дзіцячай літаратуры, якая прайшла праверку часам: ад першай публікацыі кнігі прайшло ўжо 62 гады, а яна ўсё яшчэ застаецца суперпапулярнай. «Пляменнік чараўніка» — шостая па ліку і першая паводле ўнутранай храналогіі кніга серыі. Гэта перадгісторыя, з якой мы даведваемся, адкуль з’явілася Нарнія, як дзеці трапляюць у яе праз Гардэроб і якім чынам там аказалася Белая Каралева. Пасля прачытання можна зладзіць сямейны прагляд экранізацыі і параўнаць фільм з кнігай.
Уладзімір Арлоў: «Айчына: маляўнічая гісторыя. Ад Рагнеды да Касцюшкі»
У 2016 годзе Уладзімір Арлоў стаў лаўрэатам Прэміі Цёткі ў намінацыі «Найлепшы твор для дзяцей і падлеткаў», а Павел Татарнікаў — у намінацыі «Найлепшае мастацкае афармленне». І ўсё гэта з адной толькі кнігай «Айчына». У першую чаргу яна адрасуецца дзецям, але кожны дарослы будзе рады мець такое выданне ў сваёй хатняй бібліятэцы.
Кніга яскрава дэманструе, што гісторыя — гэта цікава і захапляльна. Першая частка ахоплівае час ад старажытнасці (людзі і маманты, крывічы, дрыгавічы, радзімічы) да канца XVIII стагоддзя («Пойдзем, брацце, да Касцюшкі») і складаецца з 31 главы, кожная з якіх заканчваецца невялікай віктарынай. Так дзеці змогуць падрыхтавацца да заняткаў у школе, а бацькі — праверыць і асвяжыць свае веды.
Цяпер чытаюць
Стала вядомае імя другой беларускі, якая згінула пад селем у Непале. Гэта 24‑гадовая Ірына з журфака БДУ5
Стала вядомае імя другой беларускі, якая згінула пад селем у Непале. Гэта 24‑гадовая Ірына з журфака БДУ
Электронную «Беларускую энцыклапедыю», створаную як прастору «верагодных ведаў пра Беларусь», ціха ліквідавалі разам з рэдакцыяй. Купу артыкулаў перадалі Гігіну66
Каментары