У амерыканскім заапарку ў ільвіцы вырасла доўгая барада-грыва ФОТА
У канцы мінулага года работнікі заапарка Аклахома-Сіці звярнулі ўвагу на тое, што на шыі і галаве 18-гадовай ільвіцы Брыджыт пачалі расці лішнія валасы. Праз некаторы час стала ясна, што ў яе з'явілася характэрная для самцоў грыва, паведамляе Daily Mail.
Ветэрынары пакуль не выявілі прычыны такой выключна рэдкае з'явы, але ўжо ўзялі ўзор крыві львіцы для аналізу. Яны будуць параўноўваць кроў Брыджыт з крывёю яе роднай сястры.
Грыва льва — характэрная прыкмета палавога дэмарфізму ў гэтага віду каціных. Рост грывы рэгулюецца ўзроўнем тэстастэрону ў крыві. У самцоў ільвоў грыва пачынае расці ва ўзросце аднаго года і да чатырох гадоў фармуецца цалкам.
«Сітуацыі, калі ў самкі развіваюцца прыкметы самца, незвычайныя», — каментуе памочнік ветэрынара Грэтхен Коўл.
Тым не менш незвычайная анамалія не мусіць паўплываць на якасць жыцця ільвіцы. Ветэрынары працягваюць уважліва сачыць за ёй, але стараюцца не парушаць звыклы распарадак дня жывёлы. Акрамя лішніх валасоў ніякіх зменаў у стане здароўя Брыджыт пакуль не заўважана.
Каментары