Збітага падчас выбараў журналіста Андрэя Козела аштрафавалі на 735 рублёў
Паводле міліцыі, журналіст «Белсата» Андрэй Козел незаконна здымаў працэдуру падліку галасоў на мясцовых выбарах, а потым адмовіўся пакінуць памяшканне на патрабаванне супрацоўнікаў міліцыі.
Суддзя Іван Касцян прызнаў журналіста Андрэя Козела вінаватым у непадпарадкаванні супрацоўнікам міліцыі. І пакараў яго штрафам у 30 базавых велічыняў (735 рублёў).
Інцыдэнт адбыўся ў фінальны дзень выбарчай кампаніі на адным з участкаў у Мінску, дзе журналіст прысутнічаў у якасці даверанай асобы аднаго з кандыдатаў і вёў відэатрансляцыю падліку галасоў на сваю старонку ў Facebook.
— Старшыня камісіі запатрабавала пакінуць участак, але я працягваў, бо назіраць і здымаць падлік галасоў не забаронена заканадаўствам. Тады супрацоўнікі міліцыі выцягнулі мяне сілай, маёй галавой разбілі шкляныя дзверы ўчастка і працягвалі збіваць у калідоры, — расказаў Андрэй Козел.
Супраць журналіста склалі адміністрацыйны пратакол за непадпарадкаванне міліцыі і першы раз паспрабавалі судзіць на наступны дзень пасля затрымання.
Каментары