«Не праходзіў тэхагляд, бо не было грошай» — судзяць кіроўцу грузавіка, які насмерць збіў дзяўчынку ля «Замка»
У судзе Цэнтральнага раёна Мінска 3 красавіка пачалося пасяджэнне па гучным ДТЗ ля гандлёвага цэнтра «Замак». Абвінавачаны — кіроўца грузавіка, які 2 снежня паехаў на чырвонае святло і ўрэзаўся ў людзей на пешаходным пераходзе.
У выніку ДТЗ загінула 8-гадовая дзяўчынка, некалькі чалавек трапілі ў бальніцу.
Пасля кіроўцу ўзялі пад варту. Цяпер яму пагражае да 5 гадоў зняволення.
А той пешаходны пераход улады вырашылі ўвогуле ліквідаваць.
Пазней следчыя высветлілі, што грузавік меў праблемы з тармазамі і рулявой сістэмай, не прайшоў тэхагляд і не мусіў выязджаць на дарогу ў такім стане. Але ж, па версіі СК, кіроўца «меў магчымасць адвесці транспартны сродак ад пешаходнага пераходу, выехаўшы на газон або агароджу, што дапамагло б прадухіліць трагедыю».
На судзе абвінавачаны 56-гадовы Віталь Мычко адмовіўся ад адваката. Ён прызнаў — на абаронцу ў яго няма грошай, але на прапанову суддзі прадаставіць дзяржаўнага адваката адказаў, што не трэба.
Адна пацярпелая папрасіла суд спагнаць з Віталя Мычко кампенсацыю за прычыненне маральнай шкоды. Іншыя пацярпелыя вырашылі падаць такі ж пазоў на сына абвінавачанага, іпэшніка, якому належыў той грузавік «ЗІЛ».
«Прычым тут сын? Гэта ж я ўсё здзейсніў», — сказаў кіроўца.
Але ж суддзя Вадзім Есьман хадайніцтвы пацярпелых задаволіў.
Сваю віну Віталь Мычко прызнаў цалкам.
На «ЗІЛе» (які ў народзе яшчэ называюць «бычком») Віталь развозіў прадукты па крамах. Апошні раз машына праходзіла тэхагляд яшчэ летам 2015 года, прызнаўся кіроўца.
«Не было чым плаціць», — патлумачыў Мычко далейшую адсутнасць тэхагляду.
Але сцвярджае, што пра праблемы машыны не падазраваў.
«Каб былі такія няспраўнасці, як высветлілі, я б канечне нікуды не выехаў!» — запэўніў Мычко.
У дзень трагедыі ён таксама «не адчуваў» падчас руху, што з машынай было штосьці не так.
«Па праспекце Пераможцаў я рухаўся з хуткасцю кіламетраў 50, не больш. Я неяк задумаўся ці што, не магу патлумачыць. Пасля ўбачыў, што пайшлі людзі, ўдарыў па тармазах. Машына прыпынілася, пасля педаль правалілася і машына паехала. Я пачаў сігналіць. Намагаўся з’ехаць налева… Ну і ўсё, — распавёў пра падзеі на пешаходным пераходзе Мычко. — Цяпер што ўжо казаць — мог я з’ехаць у бок, не мог… Там усё заняло долі секунды.
Ён сказаў, што баяўся вельмі рэзка паварочваць налева ці направа, бо машына высокая і лёгка апракідваецца. Кажа, магло накрыць людзей і загінула б больш.
«Пасля ДТЗ людзі кінуліся да мяне, адны крычалі, што заб’юць, другія мяне абаранялі. У выніку мяне закрылі ў машыне, не далі выйсці да прыезда ДАІ», - узгадаў Віталь Мычко.
Пасля яго павезлі на экспертызу. Мужчына быў цвярозым. Яго змясцілі пад варту, дзе ён і знаходзіўся да суда.
Пракурор спытала, ці не хоча Мычко выбачыцца перад пацярпелымі.
«Я шкадую пра гэта. Ведаю, што гэта такое… Мы брата, калі яму было 18 гадоў… Я ведаю, што гэта для бацькоў», - сказаў ён са слязьмі на вачах.
Хто тая Аліна, з якой Лукашэнка танцаваў гэтым разам на навагоднім балі18
Каментары