21 чэрвеня родным 40-гадовага Вадзіма Ільюшонка паведамілі: мужчына памёр на стадыёне адразу пасля кроса. Па словах сваякоў, год назад яму знялі групу ЛФК, хоць у старэйшага кантралёра былі праблемы з сэрцам, паведамляе Tut.by.
— Сёння 9 дзён як з намі няма Вадзіма, толькі вярнуліся з могілак, вельмі цяжка, — распавядаюць родныя старэйшага кантралёра жодзінскай турмы № 8. — У той дзень яны здавалі квартальныя залікі, адразу ў самой турме, потым пайшлі на стадыён на вуліцу Савецкую. Спякота была 29 градусаў. Вадзім прабег паўтара кіламетра, стала блага, ён памёр побач з бегавой дарожкай.
Вадзіму Ільюшонку было 40 гадоў, у турме прапрацаваў больш за 20.
— Пра тое, што Вадзім памёр, нідзе не паведамляецца, але ж гэта надзвычайнае здарэнне. Нам толькі кажуць: «Чакайце», — уздыхаюць сваякі. — Год таму Вадзіму знялі групу лячэбнай фізічнай культуры (ЛФК), гэта значыць раней ён не бегаў кросы, а цяпер стаў. Напярэдадні ў Вадзіма схапіла сэрца, яго выратавалі і ўсё адно прымусілі бегчы. У памяць урэзалася размова, як угаворвалі яго напярэдадні не бегчы.
Як распавядае сям'я Ільюшонка, гадоў шэсць у мужчыны былі праблемы з сэрцам, ціск быў павышаным. Мінулы раз нарматывы старшы кантралёр здаў «павольна і цяжка».
— Ускрыццё паказала: у яго была ішэмічная хвароба сэрца. На якой падставе тады знялі ЛФК? Там жа працуюць людзі ва ўзросце, і чаму яны павінны бегаць у гэтую спякоту? — пытаюць сваякі.
Каментары