Сайт Крыштаповіча: «Беларусія — гэта руская зямля. На ёй жывуць ці рускія, ці прапольскія іуды»
Сайт «Тэлескоп», які рэдагуецца прыхільнікам заходнерусізму, супрацоўнікам Універсітэта культуры і мастацтваў Беларусі Львом Крыштаповічам, надрукаваў матэрыял у стылістыцы асуджаных за распальванне нацыяльнай варажнечы аўтараў «Рэгнума».
У матэрыяле пад назвай «Зберагчы Расіі Белую Русь» сцвярджаецца, што ніякай Беларусі і беларусаў няма — усё гэта, маўляў, Расія, дзе жывуць або рускія, або — «іуды».
«Уведзеныя ў зман бальшавікамі велікаросы ніяк не могуць зразумець, што Беларусія — такая ж руская зямля, як Сібір, Кубань ці Смаленская вобласць. І на гэтай зямлі жывуць два гатункі людзей: 1) рускія, 2) прапольскія іуды.
Улада, грошы і медыйныя рэсурсы ў сённяшняй РБ належаць выключна другой катэгорыі, хоць людзі з агульнарускай свядомасцю дагэтуль складаюць большасць насельніцтва Белай Русі. Адпаведна, калі расійскія дыпламаты і прадпрымальнікі працягнуць лічыць сябе ў міжнародным становішчы, знаходзячыся ў Гродне, Мінску і Віцебску, Беларусія праз непрацяглы час насамрэч стане для рускага чалавека замежжам. Прычым, такой жа несяброўскай, як Польшча ці Украіна. Шчыра спадзяюся, што, прызначаючы новага пасла ў Белоруссію, расійскае кіраўніцтва прыняло да ведама тыя небяспекі, пра якія я пішу ўжо шмат год; і Міхаіл Бабіч зможа, кажучы словамі Разанава, зберагчы Расіі як зрэнку вока гэтыя чыста рускія і глыбока рускія вобласці па Нёмане і Віліі», — піша «Тэлескоп».
Аўтар тэксту — Кірыл Авяр'янаў. Прыкладна за такія ж яго тэксты ў Беларусі быў заблакаваны доступ да яшчэ аднаго шавіністычнага рэсурса — «Спутнік і Погром».
Самому Авер'янаву забаронены ўезд у Беларусь, беларускага грамадзянства ён пазбаўлены.
Каментары