Бяда ў беларускага Z-гурта Skynet: саліст скардзіцца, што ўлады не пускаюць іх на сцэну
Калісьці рок-гурт Skynet спяваў па-беларуску — цяпер жа прысвячае песні вайне. Але нягледзячы на дэманстратыўную падтрымку Лукашэнкі і Пуціна пакрысе застаецца за бортам беларускай эстрады.
Саліст гурта Іван Панамароў паскардзіўся ў трэдсах на тое, што ніяк не можа зразумець сітуацыю ў музычнай сферы ў Беларусі:
«Спачатку нас пазбавілі ІП, потым сказалі рабіць таварыства з абмежаванай адказнасцю, пасля зрабілі рэестр, не ўваходзячы ў які ты не маеш права арганізаваць свой уласны канцэрт. А трапіць туды амаль не магчыма. Прынамсі мы спрабавалі. Гэта такая падтрымка айчыннага артыста ці створаная манаполія, дзе няма лішніх?»
Сітуацыя паказальная, бо Skynet падтрымлівае Лукашэнку, а таксама Пуціна і абвешчаную ім вайну.
Хаця яшчэ некалькі гадоў таму іх творчасць была іншай. Напрыклад, у 2019 годзе Skynet выпусціў першую беларускамоўную песню «Каханая».
Пра гэтую кампазіцыю Панамароў потым пісаў, што, калі гурт упершыню выканаў яе на карпаратыве, прыйшлося спяваць «Каханую» сем разоў запар — настолькі тая спадабалася публіцы. Пасля распачыналі гэтай песняй свае канцэрты ў Германіі і Вялікабрытаніі — і тымі канцэртамі на Захадзе вельмі ганарыліся. Як і тым, што давялося выступаць на разагрэве ў «Бі-2» ды «Акіяна Эльзы» (гуртоў, за выкананне хітоў якіх у сучаснай Беларусі можна і за краты трапіць).
А пасля падзей 2020 года Іван Панамароў (з першапачатковага складу толькі ён і застаўся) у інтэрв’ю прапагандыстцы Людміле Гладкай крытыкаваў «заходнія каштоўнасці» і «артыстаў-здраднікаў».
Напад Расіі на Украіну Панамароў успрыняў як магчымасць раскруціцца на расійскай эстрадзе. Ён пачаў ствараць песні пра вайну — напрыклад, трэк «Прямо V рай», які прысвяціў «гераічным абаронцам Данбасу і героям СВА». А «Я жывы» напісаў у гонар сябра, які ваяваў на баку Расіі (і загінуў у 2024 годзе пад Харкавам).
Артыст хваліцца тым, што такія песні добра бяруць у ратацыю расійскія радыёстанцыі. Час ад часу і выступы ў Расіі бываюць.
Нейкі ўздым у Skynet быў і ў Беларусі. У 2023 годзе іх запрашалі выступіць на музычным фестывалі Lidbeer і на «Славянскім базары».
Але апошнім часам Панамароў у сацсетках усё часцей выказвае крыўды на беларускія ўлады. Наракае, што айчынныя радыёстанцыі не вельмі хочуць браць песні Skynet, а праўладныя журналісты збольшага тактоўна адмаўляюць у інтэрв’ю.
Хаця, канечне, рана казаць, што Skynet зусім ужо ў няміласці — у навагоднюю ноч рок-гурт быў у эфіры АНТ, сёлета выступаў на Дні незалежнасці ў Салігорску ды на юбілеі МТЗ.
Святлана Ціханоўская пра крытыку з боку Ціханоўскага: Мне ад гэтага вельмі крыўдна і непрыемна40
Каментары