Упершыню ў гісторыі свайго існавання BISS запускае адукацыйны праект, які будзе называцца «be critical». Скіраваны ён будзе на прасоўванне крытычнага мыслення ў беларускім грамадстве, асабліва сярод моладзі.
Праект мае ўключаць у сябе рознага тыпу мерапрыемствы (відэалекцыі, трэнінгі, падручнікі), а яго рэалізацыя прадугледжвае цесную супрацу з іншымі адукацыйнымі і экспертнымі асяродкамі.
«Навыкі крытычнага мыслення — адны з найбольш запатрабаваных у бізнэсе, адукацыі, навуцы, медыцыне, ІТ…» — гэта вынікае з шэрагу даследаванняў над чалавечым капіталам. У развітых краінах з году ў год павялічваецца колькасць падручнікаў, трэнінгаў і публікацый па крытычным мысленні. Поруч з валоданнем ангельскай мовай і кампутарнай пісьменнасцю, крытычнае мысленне — гэта пропуск у ХХІ стагоддзе.
Колькі падручнікаў або трэнінгаў па крытычным мысленні ў Беларусі? Колькі разоў у Кодэксе аб адукацыі РБ згадваецца крытычнае мысленне? Колькі беларусаў ведае ўвогуле, што такое крытычнае мысленне? На жаль, Беларусь у гэтым плане з'яўляецца «некранутай зямлёй»: трэнінгаў — лічаныя адзінкі, падручнікаў увогуле няма, а нават навукоўцы-гуманітары блытаюць крытычнае мысленне з крытычнымі тэорыямі.
Улічваючы стратэгічную важнасць крытычнага мыслення, BISS палічыў сваім абавязкам зрабіць уклад у прасоўванне навыкаў і ведаў з гэтага абшару. На дадзены момант мы запускаем тэставую версію відэалекцый. Адначасова працягваем шукаць партнёраў і рэсурсы з мэтай забеспячэння высокай якасці і трываласці гэтага праекту. Па меры іх знаходжання і ўсталёўвання зваротнай сувязі мы будзем удасканальваць адукацыйныя мерапрыемствы як у тэхнічным, так і метадычным плане.
Кіраўніком праекту будзе Пётр Рудкоўскі, які абараніў доктарскую дысертацыю менавіта па тэорыі аргументацыі (гэта асноўны тэарэтычны базіс крытычнага мыслення), а ў мінулым праводзіў трэнінгі крытычнага мыслення для розных аўдыторыяў.
Цяпер чытаюць
Беларускую мову на ЦТ выбірае ўсё меншая доля выпускнікоў школ. Калі 20 гадоў таму яе здавала амаль палова, цяпер — толькі кожны шосты7
Каментары