Ганна Бонд адказала Качанавай: Не трэба пра ідэалогію талдычыць
Блогерка Ганна Бонд адрэагавала на заклік кіраўніцы Адміністрацыі прэзідэнта Наталлі Качанавай «адарваць дзяцей ад камп'ютараў». У інтэрв'ю Свабодзе Ганна Бонд выказалася аб трагедыі ў Стоўбцах і ацаніла рэакцыю на яе ўладаў.
«Вось спадарыня Качанава сказала, што трэба «адарваць дзяцей ад камп'ютараў, абмежаваць іх доступ у інтэрнэт». Засцерагчы дзіця ад інтэрнэту — ня выйсце з сітуацыі: у інтэрнэце ёсць шмат карыснай інфармацыі. Калі яшчэ і інтэрнэт забараніць, то ў дзяцей зусім нічога не застанецца, бо тэлевізар нават у рэгіёнах ужо даўно не глядзяць», — кажа Ганна Бонд.
На думку Ганны Бонд, кіраўніца прэзідэнцкай адміністрацыі павінна падумаць, як арганізаваць дзецям вольны час, а не як рабіць «акцэнты на выхаваўчую работу».
«Кіраўнікі, супакойцеся! Трэба не пра ідэалогію талдычыць. Падумайце, як у школу ўкласці душу, каб дзіця не хадзіла туды, як у папраўчую ўстанову, а хацела там знаходзіцца, каб яму там было цікава і ўтульна», — кажа Ганна Бонд.
Яна ўзгадала і зусім нядаўнюю трагедыю, калі сацыяльныя работнікі забралі ў сям’і дзяцей, а маці ад безвыходнасці павесілася — і гэта не адзінкавы такі выпадак.
«Што гэта за ідэалагічная праца такая? Трэба прадумаць, як у рэгіёнах дзецям бавіць час, чым іх заняць, каб дзеці там развіваліся, а не тупа сыходзілі ў інтэрнэт і каб іх не паглыналі сацыяльныя сеткі. Рэгіёны трэба ажыўляць, бо моладзь адтуль з'язджае ад безвыходнасці, там ёй няма чаго рабіць, няма перспектываў — асабліва ў малых гарадках, пасёлках», — кажа Бонд.
Што да трагедыі ў Стоўбцах, то, на думку Ганны Бонд, пэўны канфлікт там быў, бо не можа хлопчык з нармальнай сям’і, няхай сабе незаможнай і сціплай, знянацку накінуцца на людзей.
«Мне вельмі шкада і бацькоў ахвяраў, і бацькоў нападніка. Гэта вялікая трагедыя не толькі для канкрэтных сем’яў, а страшны ўрок для ўсёй краіны.
Таксама гэтая сітуацыя яшчэ раз паказала, што кожнаму з бацькоў трэба звярнуць увагу на сваё дзіця. У дзетак павінна быць духоўнае выхаванне. Бацькі, разглядзіце чалавека ў сваім дзіцяці, улавіце яго настрой».
Качанава пра трагедыю ў Стоўбцах: Трэба дзяцей адарваць ад камп'ютараў, дзе шмат негатыўнай інфармацыі
-
«Мне казалі: ты гаворыш як канадскі эмігрант». Сяргей Шупа расказаў пра Вільню 90-х, параўнанне літоўскай літаратуры з беларускай і адрозненні паміж народамі
-
Лукашэнка паводзіць сябе ў «макдональдсе» як у савецкай сталоўцы. І думае, што гэта крута
-
Пуцін ужо павіншаваў Маджтабу Хаменеі, а Лукашэнка не. Чаго чакае?
Цяпер чытаюць
Выхадцы з «Альфа» КДБ Беларусі займаюць кіраўнічыя пасады ў новым расійскім суперсакрэтным спецпадраздзяленні, прызначаным для забойстваў за мяжою18
Каментары