Акадэмік Пятро Віцязь распавёў Свабодзе, што кіраўніцтва Нацыянальнай акадэміі навук Беларусі цяпер вядзе перамовы зь Менскім гарвыканкамам аб выдзяленьні месца для музэю касманаўтыкі, піша «Радыё Свабода».
«Мы пераконваем гарадзкія ўлады ў тым, што ў сталіцы нашай краіны павінен быць такі музэй. Калі ў Менску хочуць бачыць болей турыстаў, асабліва замежных, то ён проста неабходны. Цяпер прапрацоўваюцца розныя варыянты месца для музэю. Мы зьбіраем для яго экспанаты, цікавыя дакумэнты. Гэта неабходна рабіць, бо з кожным годам, на жаль, частка зь іх губляецца», — сказаў Пётар Віцязь.
На пытаньне Свабоды, ці будзе ў гэтым музэі месца для славутага беларуса, акадэміка Міжнароднай акадэміі астранаўтыкі Барыса Кіта, якому ў 2020 годзе споўнілася б 110 гадоў, Віцязь адказаў станоўча:
«Безумоўна. Гэта ж адзін з заснавальнікаў касьмічнай навукі. Ягоны ўнёсак у разьвіцьцё нашай навукі вельмі вялікі. Мы яго памятаем. Віншавалі са 100-годзьдзем, калі ён быў яшчэ жывы. На жаль, у наступным годзе ўжо павіншаваць не давядзецца. Барыс Кіт пражыў вялікае і складанае жыцьцё. Былі ў ім і моманты, якія ня ўсе разумеюць. Але і час быў няпросты. А навуковец ён выдатны».
Асьветнік і навуковец Барыс Кіт памёр 1 лютага на 108-м годзе жыцьця ў Франкфурце-на-Майне.
Барыс Кіт нарадзіўся ў 1910 годзе ў Санкт-Пецярбургу. Бачыў Лютаўскую рэвалюцыю. Пасьля кастрычніцкага перавароту ягоны бацька, ратуючыся, перавёз сям’ю ў вёску Агароднікі Карэліцкага раёну. Скончыў Віленскі ўнівэрсытэт імя Стэфана Баторыя, выкладаў матэматыку і быў дырэктарам Віленскай беларускай гімназіі, пазьней Наваградзкай гімназіі. За беларускую дзейнасьць перасьледаваўся ўладамі Польшчы, СССР, нацысцкай Нямеччыны.
У 38 гадоў эміграваў у ЗША. Працаваў у розных кампаніях, удзельнічаў у амэрыканскіх праектах падрыхтоўкі да палётаў у космас, дасьледаваў касьмічныя праграмы СССР. Прафэсар, доктар матэматыкі, акадэмік Міжнароднай акадэміі астранаўтыкі, сябра многіх іншых міжнародных і нацыянальных акадэмій і абʼяднаньняў.
Цяпер чытаюць
«Мы даём Штатам тое, што яны хочуць». Расійскі канал апублікаваў відэа, якое называюць запісам Рыжанкова схаванай камерай у машыне14
Каментары