Ніколь Кідман расказала, чаму пераехала ў глыбінку, і прызналася, што не кантактуе з усыноўленымі дзецьмі
Ніколь Кідман, актрыса, спявачка і прадзюсарка, стала гераіняй вокладкі амерыканскага часопіса Vanity Fair. Яе інтэрв'ю і фотасесія з'явяцца ў майскім нумары.
Для фотасесіі стылісты выбралі чорную сукенку Prada з блакітнымі кветкамі і ўпрыгажэнні ад Tiffany & Co.
Ніколь Кідман распавяла журналістам выдання, што аддае перавагу жыццю далей ад Галівуду па-за здымачнага працэсу. У яе ёсць дом недалёка ад Нэшвіла, сталіцы штата Тэнэсі, дзе яна праводзіць час разам з мужам Кітам Урбанам і дзецьмі: дзесяцігадовай Сандэй Роўз і васьмігадовай Фэйт Маргарэт. Пад Нэшвіл актрыса пераехала трынаццаць гадоў таму, пасля таго як выйшла замуж за музыканта Кіта Урбана. Тут зорцы прасцей застацца незаўважнай і весці нармальнае жыццё.
Актрыса распавяла аб выхаванні дзяўчынак: Кідман прытрымліваецца строгіх правілаў, яна забараняе ім карыстацца тэлефонам і заводзіць акаўнты ў сацыяльных сетках. Дзеці ўвесь час чымсьці занятыя, займаюцца музыкай і здымаюць відэа. Аднак ні Кідман, ні яе муж не настойваюць на тым, каб дочкі пайшлі па іх слядах.
— Не думаю, што дзяцей можна ў нешта сілком ўцягнуць. Можна толькі падштурхнуць, таму што матывацыя — сапраўды складаная рэч. Мяне ніхто не падштурхоўваў да таго, каб стаць актрысай. Хутчэй, наадварот, утрымлівалі ад гэтага.
Тым не менш Сандэй і Фэйт ўжо паспелі зняцца ў кіно разам з мамай. У чэрвені на экраны выйдзе другі сезон папулярнага драматычнага серыяла «Вялікая маленькая хлусня», зняты паводле рамана Ліяны Марыярці. За ролю жанчыны, якая пакутуе ад гвалту з боку мужа, Ніколь Кідман атрымала прэмію «Залаты глобус» у намінацыі «Найлепшая актрыса міні-серыяла ці тэлевізійнага фільма». Дзеці і муж актрысы з'явяцца ў адным з эпізодаў.
Таксама актрыса распавяла пра дзяцей, якіх яна ўсынавіла падчас шлюбу з Томам Крузам: яны ўжо выраслі і жывуць самастойна — Конар займаецца музыкай у Маямі, а дачка Бэла пераехала ў Англію. Яны маюць мала зносін з Ніколь.
Таксама Кідман выказалася пра ўзрост актрысы ў сучаснай індустрыі кіно:
— Больш у актрыс няма пэўнага тэрміну «прыдатнасці», як гэта было раней. Трэба ўвесь час развівацца, бо мы нават жывем даўжэй, чым раней, калі нам пашанцуе, вядома. Таму я стараюся ўжываць сваю творчую энергію і не спыняцца.
Цяпер чытаюць
Палітолаг Аліна Харысава пагадзілася супрацоўнічаць з СБУ. Аказалася, гэта было КДБ20
Каментары