Пнеўманія, якую выклікае каранавірус новага тыпу (SARS-CoV-2), у асноўным паражае лёгкія, але можа ўплываць і на працу сэрца. Да такой высновы прыйшлі кітайскія навукоўцы па выніках ускрыцця пацыентаў, якія памерлі ад гэтага захворвання, піша tass.ru са спасылкай на публікацыю ў Journal of Forensic Medicine.
Кітайскія навукоўцы праводзілі аналіз на аснове звестак аб ускрыцці 11 пацыентаў векам ад 52 да 80 гадоў, якія памерлі ад SARS-CoV-2. Дзевяць з іх праводзіліся ў Ухані, яшчэ два — у Шанхаі.
Вынікі паказалі, што вірус у асноўным выклікае запаленчыя працэсы ў дыхальных шляхах і альвеалярных мяшэчках. Параўнанне пашкоджанняў ад атыповай пнеўманіі і новай віруснай пнеўманіі паказалі, што ў першым выпадку больш выяўлены фіброз лёгкіх, гэта значыць паталогія, пры якой лёгачную тканку замяшчае злучальная. Пры гэтым ацёк лёгкіх пры SARS-CoV-2 выяўляецца больш сур'ёзна, чым пры атыповай пнеўманіі.
Таксама даследаванне паказала, што невялікая колькасць выдзяленняў з лёгкіх можа трапляць у грудную клетку і негатыўна ўплываць на працу сэрца. Гэты факт можа растлумачыць тое, чаму пацыенты з сардэчна-сасудзістымі захворваннямі пераносяць кітайскую вірусную пнеўманію горш, аднак гэтую сувязь яшчэ трэба праверыць у дадатковых даследаваннях.
Навукоўцы адзначаюць, што для таго, каб зразумець, як вірусная пнеўманія ўплывае на працу нырак, галаўнога мозга, селязёнкі і стрававальнай сістэмы, патрэбныя дадатковыя даследаванні. Гэта звязана з невялікім памерам выбаркі і векам пацыентаў: у іх маглі быць іншыя спадарожныя хваробы, якія паўплывалі на вынікі.
Цяпер чытаюць
На свой дзень нараджэння Зяленскі з Наўроцкім, Наўседам і Ціханоўскай у Вільні ўшануе памяць Кастуся Каліноўскага5
Каментары