Меры па барацьбе з распаўсюджваннем каранавіруса могуць разбурыць эканамічную аснову Еўразійскага эканамічнага саюза, лічыць Аляксандр Лукашэнка. Такую заяву ён зрабіў на саміце ЕАЭС, які прайшоў у анлайн-фармаце, перадае БелТА.
У якасці прадмета размовы Лукашэнка прапанаваў тэму забеспячэння стабільнасці і спакою ў грамадстве, недапушчэння размывання асноў ЕАЭС з-за імкнення ў першую чаргу засцерагчы ад небяспекі толькі сябе. «Калі мы не аб'яднаем намаганні, то заўтра будзем аднаўляць парушаныя эканамічныя сувязі, і на гэта пойдзе шмат часу, грошай і працы», — упэўнены Лукашэнка.
Паводле яго слоў, тое, што цяпер адбываецца ў свеце, пацвярджае выказаныя засцярогі: вірус разбурае жыцці і сем'і, уносіць сумятню ў работу рынкаў, вядзе да спынення цэлых галін, сур'ёзна ўплывае на стан спраў у нафтавай сферы.
«Аднабаковыя дзеянні дзяржаў паставілі пад пагрозу гандлёвыя адносіны, кааперацыйныя ланцужкі, працоўную міграцыю. Адсутнасць каардынацыі намаганняў узмацняе гэтыя негатыўныя фактары. Таму эгаістычныя рашэнні, якія прымаюцца без аглядкі на наступствы як мінімум у адносінах да бліжэйшых партнёраў, стратэгічна не будуць мець поспеху. У сённяшняй сітуацыі толькі дзякуючы з'яднанасці і рашучасці мы зможам даць рады пандэміі і яе наступствам», — заявіў Лукашэнка.
Ён заклікаў рашуча дзейнічаць разам, разлічваць не толькі на бягучае развіццё сітуацыі, але і на перспектыву, прадумаць фарміраванне ўласнага рэгіянальнага «пояса бяспекі» шляхам паскарэння стварэння імпартазамяшчальных вытворчасцей і лакалізацыі на тэрыторыі саюза крытычна важных галін. «Акрамя таго, нам патрэбны супольныя механізмы рэагавання на глабальныя крызісы новага роду — эпідэмічныя, супольныя нормы і планы дзеянняў у надзвычайных сітуацыях у мэтах змяншэння рызык», — лічыць Лукашэнка.
Цяпер чытаюць
Куды цяпер едуць вучыцца беларускія студэнты — топ краін і тэндэнцый14
Каментары