«Паток пацыентаў прыкметна пачаў расці пасля Вялікадня. Роўна на пяты дзень». Доктарка — пра працу ў пандэмію
Доктарка прыёмнага аддзялення 10-й гарадской клінічнай бальніцы Мінска ў сваім twitter перыядычна робіць карысныя допісы пра працу падчас пандэміі. Яна распавяла, што колькасць пацыентаў прыкметна вырасла пасля Вялікадня, паведамляе Tut.by.
Учора ў twitter доктара з'явілася публікацыя пра тое, што вырашаць, каму з пацыентаў больш патрэбна кісларод, — цяжка. Мы вырашылі высветліць, што медык мела на ўвазе.
Доктар патлумачыла, што пакуль сітуацыя не крытычная, медыкі спраўляюцца з патокам пацыентаў, які прыкметна вырас пасля Вялікадня. Але што будзе далей — невядома. Кісларод (а не ШВЛ) — гэта мера, пры якой дапамагаюць насыціць кроў кіслародам праз трубачкі. Аднак яго трэба падключыць да штэкераў у палатах. І калі бальніца першапачаткова была шматпрофільнай, а толькі ва ўмовах пандэміі стала інфекцыйнай, гэтыя штэкеры ёсць не ў кожнай палаце.
— Падчас змены мне трэба было пераводзіць пацыентаў, у якіх стан горшы, менавіта ў тыя палаты, дзе ёсць магчымасць падключыць кісларод. А тых, каму ўжо лепш, — у іншыя палаты, без кіслароду. Кіслароду ў нас дастаткова, але падключыць яго можна не ў кожнай палаце, бо наша клініка першапачаткова не інфекцыйная, дзе б гэта было паўсюдна. Падключыць пацыента да кіслароду можна толькі ў пэўных аддзяленнях, і туды мы і стараемся класці больш цяжкіх пацыентаў. Пацыента на кісларод мы кладзём як мінімум на дзень, каб аднавіць узровень кіслароду ў крыві, але ў цэлым каб стан стабілізаваўся, трэба некалькі дзён, — кажа Дар'я Чэхава, тэрапеўт прыёмнага аддзялення 10-й гарадской клінічнай бальніцы. — Учора за суткі шпіталізавалі каля 100 чалавек, але ў нас вольныя месцы ёсць, бо бальніца разлічана на вялікую колькасць пацыентаў і стацыянар у цэлым лічыцца вялікім.
Паток пацыентаў прыкметна пачаў расці пасля Вялікадня, пры гэтым шматлікія пацыенты адзначалі, што захварэлі выразна 24 красавіка (праваслаўны Вялікдзень быў 19 красавіка) — гэта якраз сярэдні па працягласці інкубацыйны перыяд.
Нагадаем, раней паведамлялася, што сімптомы каранавіруса, як правіла, пачынаюць праяўляцца на 5-7 суткі пасля заражэння.
«Быў галодны, як з Асвенціма, не еў ні мяса, ні гародніны». Што вядома пра смерць бабруйскага журналіста, на якога завялі крымінальную справу ў Польшчы1919
Каментары