І абышоўся штрафам у 2 мільёны рублёў.
Гэта гісторыя, падобная да сюжэту крымінальнага серыяла, адбылася ў Паўночным пасёлку Баранавічаў раніцай 21 чэрвеня.
Інспектар дарожна‑патрульнай службы ДАІ Баранавіцкага гарадскога аддзела ўнутраных спраў Юры Скапец расказаў, што аўтамабіль «Опель‑Вектра» зацікавіў яго сваім рухам — аўтамабіль «віхляў» з боку ў бок.
Інспектар загадаў спыніцца. Аднак кіроўца не толькі не прытармазіў, але наадварот націснуў на газ.
Юры Скапец кінуўся на сваім аўтамабілі ў пагоню. Парушальнік ляцеў на вялікай хуткасці (паводле Ю. Скапца, на асобных участках яна сягала 140 км/г). Прычым ні маячкі, ні патрабаванне спыніцца па гукаўзмацняльніку на парушальніка не дзейнічалі.
Наадварот кіроўца «Опеля» (у салоне былі яшчэ два яго сябрукі) нібы гуляўся з інспектарам.
Ён некалькі разоў прытармажваў, чакаў, покуль Ю. Скапец наблізіцца да яго машыны, -- а потым ціснуў на газ.
Пагоня доўжылася па вуліцах гораду недзе з гадзіну. Урэшце знясіліўшыся інспектар папрасіў калег аб дапамозе, прыйшлі на дапамогу супрацоўнікі мясцовага дэпартамента аховы.
На шляху машынаў не раз трапляліся пешаходы, раварысты, якія, паводле супрацоўніка дэпартамента аховы Аляксандра Макарэвіча, пабачыўшы аўтамабіль мясцовага Менцюка адскоквалі ў бок, каб, крый божа, не трапіць пад колы.
Ад большай колькасці народу і магчымай трагедыі выратавала тое, што была раніца (9 гадзін) выходнага дня.
На адным з паваротаў машыну парушальніка занесла і выкінула ў кювет. Юры Скапец першы падбег да машыны і праз акенца кіроўцы паспрабаваў выцягнуць ключ запальвання. Аляксандр Макарэвіч набліжаўся з правага боку.
У гэты момант парушальнік газануў, і аўтамабіль пачаў паскарацца. Юрыя Скапца такім чынам працягнула некалькі сот метраў.
Ад трагедыі выратавалі стрэлы па колах супрацоўніка дэпартамента аховы Аляксандра Макарэвіча. Праехаўшы яшчэ дзвесці метраў, «Опель» урэшце спыніўся.
Парушальнікам аказаўся 35‑гадовы жыхар Баранавічаў, які быў у стане алкагольнага ап’янення. Яго два сябрукі таксама былі нецвярозыя. Цікава, што кіроўцу пазбавілі ў 2007 г. правоў за кіраванне аўтамабілем у нецвярозым стане.
Яшчэ больш цікава стала на наступны дзень. Суд Баранавіцкага раёна і горада Баранавічы вынес пастанову ад прыцягненні затрыманых да адміністрацыйнай адказнасці.
Кіроўцу давядзецца заплаціць штраф памерам 2 млн 380 тыс. рублёў, пасажырам аўтамабіля (за непадпарадкаванне службовай асобы пры выкананні ім службовых паўнамоцтваў) — па 980 тыс. рублёў.
Некаторыя супрацоўнікі праваахоўчых органаў палічылі пакаранне занадта мяккім.
«П’яны, без правоў, на хуткасці, ледзь чалавека не пакалечыў, а колькі мог бы пакалечыць — і за гэта толькі штраф? Месца такім у турме», — выказаў сваю думку супрацоўнік міліцыі, які не пажадаў назваць сваё імя.
***
Усяго з пачатку году ў Баранавічах затрымалі 512 кіроўцаў у стане алкагольнага ап’янення. 35 з іх цягам году паўторна селі за руль п’янымі.
Цяпер чытаюць
Адданага ябацьку, які абражаў Святлану Ціханоўскую ў Threads, кінулі за краты13
Каментары