Памятаеце, як мінскай доктарцы далі вялізны штраф за шпацыр у чырвоным на Дзень Волі? Суд яго адмяніў
Мінскую доктарку лабараторнай дыягностыкі Ірыну Бянькоўскую судзілі за шпацыр 25 сакавіка. Яна ішла ў чырвоных ботах, паліто і берэце, калі яе без тлумачэнняў затрымалі і пасадзілі ў бус.
«Пасля ў РУУС сказалі, што я занадта прыгожа апранутая, каб спакойна хадзіць па вуліцах. Склалі пратакол, напісалі, што я прымала ўдзел у недазволеным мітынгу з мэтай выказвання сваіх палітычных поглядаў», — дзялілася тады Ірына.
За той шпацыр суд Кастрычніцкага раёна выпісаў доктарцы 90 базавых штрафу — 2610 рублёў. Для медыка — вялізныя грошы. Жанчына пазбавілася таксама месца працы: з 37-й гарадской паліклінікі ёй давялося звольніцца па пагадненні бакоў.
Штраф Ірына вырашыла абскардзіць. Пасяджэнне ў Мінскім гарадскім суддзе прайшло 3 чэрвеня.
«Усе гэтыя справы шыюцца з парушэннем працэсуальна-выканаўчага кодэкса. Гэта быў мой асноўны аргумент — шматлікія парушэнні», — кажа доктарка.
Разам з абаронцам яна падрыхтавала скаргу. У ёй Ірына адзначыла, што падставы для пачатку адміністрацыйнага працэсу ў адносінах да яе не мелася, пратакол па сваім змесце не адказвае патрабаванням закону, доказы і абставіны справы даследаваныя не цалкам, заяўленыя ёй хадайніцтва не дазволеныя.
Суд звярнуў увагу на наступную дэталь. На мінулым пасяджэнні доктарка падала скаргу на ўчастковага інспектара, які складаў пратакол. Разгледзець яе мусілі разам са справай (ч. 1 арт. 7.2 працэсуальна-выканаўчага кодэкса). Але на пасяджэнні ніякага рашэння па скарзе не прынялі. Гэта істотнае парушэнне закону.
На падставе гэтага пастанову аб штрафе адмянілі і накіравалі справу на пераразгляд іншаму суддзе.
«Трэба разумець, што гэта яшчэ не канчатковая перамога. Будзе паўторнае пасяджэнне раённага суда. Але спадзяюся, рашэнне аб адмене застанецца», — кажа Ірына. Штраф яна яшчэ не плаціла.
Цяпер чытаюць
Бабарыка расказаў, чаму перад выбарамі не шукаў падтрымкі ў Расіі. І як яго хацелі звольніць з Белгазпрамбанка за лозунг «Жыве Беларусь!»6
Бабарыка расказаў, чаму перад выбарамі не шукаў падтрымкі ў Расіі. І як яго хацелі звольніць з Белгазпрамбанка за лозунг «Жыве Беларусь!»
Максім Знак пра прэс-канферэнцыю ва Украіне: Мы дамовіліся не ўздымаць найбольш балючыя тэмы — катаванняў, санкцый, вайны. Можа, мусілі мы па-іншаму зрабіць99
Каментары