10 жніўня авіякампанія «Іракскія авіялініі» выканае эвакуацыйны рэйс з Мінска. Пра гэта напісаў на сваёй старонцы ў твітары пасол Ірака ў Расіі і Беларусі Абдулрахман Хамід аль-Хусэйні, паведамляе zerkalo.io.
«Кампанія «Іракскія авіялініі» арганізуе эвакуацыйны рэйс для іракскіх грамадзян, якія застаюцца ў Беларусі» — напісаў ён. Паводле паведамлення, рэйс запланаваны на аўторак, 10 жніўня.
«Консульская дэлегацыя пасольства будзе прысутнічаць у офісе кампаніі «Іракскія авіялініі» і ў аэрапорце, каб прадаставіць усе магчымыя паслугі паважаным грамадзянам», — напісаў пасол.
Раней Упраўленне грамадзянскай авіяцыі Ірака (ICAA) на падставе распараджэння ўрада краіны адмяніла ўсе авіярэйсы ў Мінск «да далейшага паведамлення». Адначасова дазволена адпраўляць пустыя самалёты ў Мінск, каб забраць грамадзян Ірака дадому.
6 жніўня ў Багдад патэлефанавалі вярхоўны прадстаўнік ЕС па замежных справах і палітыцы бяспекі Жазэп Барэль, а таксама міністры замежных спраў Літвы Габрыэлюс Ландсбергіс і Латвіі Эдгарс Рынкевічс. Падчас перамоваў кіраўнік іракскай дыпламатыі Фуад Хусейн распавёў аб мерах, прынятых для абароны суграмадзян, якія сталі ахвярамі кантрабандных сетак, у тым ліку аб часовым спыненні палётаў у Мінск і арганізацыі зваротных рэйсаў у Багдад. Меры прынятыя ў дадатак да расследавання выкарыстання грамадзян у злачынных мэтах і нападу на іх, пасля чаго немагчыма высветліць іх далейшы лёс, адзначае МЗС Ірака.
Літва ўхваліла рашэнне іракскіх уладаў. «Вітаю рашэнне ўрада Ірака прыпыніць усе палёты ў Мінск. Толькі працуючы разам мы зможам ліквідаваць сеткі, якія займаюцца кантрабандай людзей у ЕС. Чакаю, што іншыя авіякампаніі прыпыняць палёты ў Беларусь», — напісаў у твітары міністр замежных спраў Габрыэлюс Ландсбергіс.
Цяпер чытаюць
Каля Сафіі ў Полацку паставілі помнік лётчыкам Нічыпарчыку і Куканенку. Але нават не самалёт той мадэлі, на якой яны загінулі, а аэраплан сталінскага часу2020
Каментары