Дырэктар канадскіх авіяліній заявіў, што не ведае адну з дзяржаўных моваў ‒ пачаліся пратэсты
Майкл Русо, дырэктар канадскіх авіяліній Air Canada, выступіў у гэтым месяцы перад франкамоўнай аўдыторыяй на англійскай мове. На пытанне журналістаў, ці гаворыць ён па-французку, Русо прызнаўся: «Я пражыў у Квэбэку 14 год, не ведаючы французскай, і думаю, што гэта шмат добрага кажа пра горад Манрэаль». Каля сотні чалавек з плакатамі падцягнуліся да аэрапорта пад Манрэалем, патрабуючы яго адстаўкі. Пра скандал паведамляе Wall Street Journal.
Супрацьстаянне франкамоўных і англамоўных канадцаў у Квэбэку цягнецца з 18 стагоддзя. Але ў гэтым месяцы абаронцы французскай мовы пайшлі далей і пачалі адрасна змагацца з кіраўнікамі буйнога бізнэсу, якія так і не вывучылі дзяржаўную мову.
«Гэта абраза Квэбэка», — заявіла Мары-Ан Алёпэн, арганізатарка пратэстаў супраць Русо, і прэзідэнтка групы прасоўвання франкафоніі. Бо французская — дзяржаўная мова ў Канадзе, а ў Квэбэку яна афіцыйная мова ўраду, судоў, адукацыі і бізнэсу, пачынаючы з 1970-х гадоў.
Да 1970-х кіраўнічыя пасады вядучых кампаній займалі ў асноўным англамоўныя людзі. Цяпер сітуацыя мяняецца. Варта ўлічыць, што насельніцтва Квэбэка — 8 мільёнаў чалавек, а англамоўных сярод іх — толькі семсот тысяч.
Квэбэк паслядоўна уводзіць больш строгія моўныя правілы. Так, у 2019 годзе федэральны суд Канады абавязаў усё тыя ж авіялініі Air Canada сплаціць 17 000 даляраў маральнай кампенсацыі франкамоўнай пары, якая заўважыла на борце самалёта, што надпісы «выхад» і «асцярожна» зробленыя большымі літарамі па-англійску і меншымі па-французску.
Кіраўніцтва авіяліній вымушанае было апраўдвацца за словы свайго дырэктара і цяпер. Яны ўжо заявілі, што Русо пачаў браць урокі французскай мовы і іспыт па ёй увойдзе ў яго штогадовую атэстацыю.
Але працэс рушыў, і нічога яго не спыніць. Выпадак з няведаннем французскай мовы Майклам Русо прэм’ер-міністр Канады Джасцін Трудо назваў «проста непрымальным». І нават адмовіўся каментаваць.
Прэм’ер Квэбэка Франсуа Лего ўжо заявіў, што хоча правесці сустрэчу з усімі дырэктарамі буйных кампаній Квэбэка і абмеркаваць іх французскую мову. Прадстаўнікі дырэктараў пачалі публікаваць справаздачы пра іх моўныя кампетэнцыі.
Нехта бярэ прыватныя ўрокі, нехта актыўна займаецца на курсах.
Каментары