«Пакінула суд са словамі «Жыве Беларусь». Для ўжо асуджанай Вольгі Класкоўскай пракурор папрасіў 2,5 года калоніі па новай справе
У судзе Маскоўскага раёна Брэста 19 студзеня адбыўся разгляд новай крымінальнай справы супраць палітзняволенай Вольгі Класкоўскай, якую распачалі, калі жанчына ўжо адбывала тэрмін у гомельскай калоніі па першай справе.
Год таму Вольгу асудзілі да двух гадоў калоніі за ўдзел у пратэстах у кастрычніку 2020 года, цяпер яе судзяць па арт. 369 Крымінальнага кодэкса (абраза прадстаўніка ўлады) за каментарый у адрас брэсцкага міліцыянта, паведамляе «Новы час».
Цяпер Класкоўская абвінавачваецца ў абразе супрацоўніка Ленінскага РАУС Андрэя Хвесюка. Гэты каментарый быў змешчаны яшчэ да яе арышту, але справу супраць палітзняволенай завялі толькі ў жніўні 2021 года — праз сем месяцаў пасля прысуду па першай справе.
На судзе Вольга адмовілася ўставаць пасля абвяшчэння складу суда і назваць сваё імя і прозвішча. Яна таксама адразу заявіла хадайніцтва аб сваім выдаленні з залы пасяджэнняў і заявіла, што «суд над ёй незаконны і несправядлівы і ўдзельнічаць ў гэтым яна не збіраецца». Суд задаволіў яе хадайніцтва. Яна пакінула залу судовага пасяджэння пад канвоем з воклічам «Жыве Беларусь». Разам з ёй гэтае пасяджэнне пакінула і яе маці Людміла, якая прыехала ў Брэст падтрымаць сваю дачку.
«Вольга выглядае бадзёрай, упэўненай у сваёй праваце», — распавяла Людміла Класкоўская, якая не бачыла дачку больш за год.
Суддзя Марыя Аліферук абвесціць прысуд сёння, 20 студзеня, у 16 гадзін.
Раней Вольгу ўжо асудзілі да двух гадоў калоніі па ч. 1 арт. 342 КК за перакрыццё руху транспарту ў мінскай Серабранцы. За ўвесь час у няволі Класкоўскую неаднаразова змяшчалі ў карцар і ў памяшканне камернага тыпу. Вольга ўжо адбывала пакаранне ў гомельскай калоніі №4, калі супраць яе ўзбудзілі новую крымінальную справу.
У СІЗА-7, куды яе этапавалі з калоніі пасля завядзення крымінальнай справы, яе паставілі адразу на два прафілактычныя ўлікі: як «схільную да экстрэмісцкай і іншай дэструктыўнай дзейнасці» і «схільную да захопу закладнікаў, нападу на адміністрацыю і хуліганскіх праяваў».
-
Пасольства Польшчы ў Мінску змяняе правілы прыёму дакументаў на карту паляка
-
Славенія заплаціць беларусу амаль 100 тысяч еўра за тое, што на яго навялі пісталет пры затрыманні, а пасля пратрымалі год за кратамі
-
«Пагроза бяспецы калег». Зазулінская патлумачыла, чаму ў «Еўрапейскім выбары» перасталі давяраць Мамаевай
Цяпер чытаюць
«Спасибо, Лена! Продолжайте вести наблюдение». Афіцэр, які пісаў Харысавай, пасвіўся ў чатах палітэміграцыі, а некаторым дзяўчатам нават прапаноўваў абмяняцца нюдсамі9191
Каментары