Толькі зараз стала вядома, што падчас суда над спартыўным журналістам Аляксандрам Івуліным 10 сутак арышту атрымаў 19-гадовы студэнт-трэцякурснік Пінскага педкаледжа Ілля Дабрадзей. Такі прысуд яму вынесла суддзя Наталля Дзядкова з суда Партызанскага раёна Мінска, паведамляе правабарончы цэнтр «Вясна».
Іллю затрымалі 17 студзеня ў судзе Савецкага раёна Мінска, куды ён прыйшоў падтрымаць журналіста і футбаліста Аляксандра Івуліна. Міліцыянтам не спадабаліся тры бел-чырвона-белыя паласы на заплечніку студэнта.
На Дабрадзея склалі пратакол паводле арт. 24.23 КаАП, абвінаваціўшы яго ў несанкцыянаваным пікетаванні.
На судзе 19 студзеня Дабрадзей сваю віну не прызнаў. Хоць на заплечніку ягоным сапраўды ёсць бел-чырвона-белыя палосы, але свае палітычныя погляды ён праз іх не выказваў.
Тым не менш, суддзя прызначыла яму 10 сутак арышту, якія ён, відаць, ужо адбыў. Хоць у бягучай практыцы рэпрэсіўнай сістэмы бясконцае дадаванне тэрмінаў адседкі па надуманых абвінавачаннях тым, хто нечым не дагадзіў — зусім не рэдкасць.
Каментары