Маньякі побач з намі. Як сябар гадамі шантажаваў вядомага футбаліста ананімнымі мэсэджамі
Фабіа Квальярэла — 39-гадовы футбаліст, які шмат сезонаў зачароўваў сваёй гульнёй фанатаў італьянскай «Сампдорыі» і нацыянальнай зборнай Італіі. Пры гэтым мала хто ведаў, якая драма разгортваецца ў прыватным жыцці зоркі.
Прыкладна з 2006 года Квальярэлу пераследаваў невядомы. Футбаліст атрымліваў лісты з пагрозамі. Да яго калегаў па клубу «Напалі», дзе тады гуляў Фабіа Квальярэла, прыходзілі дзіўныя эсэмэскі пра яго: нібыта Квальярэла — педафіл, ужывае какаін і звязаны з мафіяй, піша onet.pl.
Выявілася, што невядомы злачынец — гэта сябар футбаліста, былы паліцэйскі Рафаэль Пікала.
Спачатку Пікала павінен быў проста разабрацца з месэнджарам гульца, які нехта ўзламаў. Іх агульны знаёмы Джуліа Дэ Рыза атрымліваў ад невядомага паведамленні з пагрозамі. Пазней злачынцы пачалі пагражаць і Фабіа Квальярэлу. Футбаліст папрасіў Рафаэля Пікала вырашыць гэтае пытанне.
З цягам часу паліцэйскі заваяваў давер зоркі. Квальярэла пачаў праводзіць усё больш часу разам з новым сябрам. Ён абяцаў Фабіа вырашыць пытанне са злачынцам, падтрымліваў яго, але забараняў таму расказваць іншым пра пераслед.
Рафаэль Пікала рабіў выгляд, што расследуе гісторыю з Фабіа, але яго расследаванне было фікцыяй.
Тым часам колькасць паведамленняў усё расла, Фабіа Квальярэла нават атрымаў фота труны са сваёй выявай у ёй.
У гульца пачалася дэпрэсія, праблемы ў клубе, ён вырашыў перайсці ў каманду-канкурэтна — турынскі «Ювентус». Гэта выклікала шалёную рэакцыю фанатаў «Напалі».
Але праз ажно пяць гадоў пераследу Пікала зрабіў памылку, якая выклікала падазрэнні ў футбаліста. Ён паспрабаваў запэўніць «сябра», што сітуацыя пагаршаецца і што цяпер ён сам атрымлівае лісты ды паведамленні з пагрозамі. Калі ж гулец папрасіў яго іх паказаць, каб параўнаць змест, Пікала адказаў, што ўжо ўсё выдаліў.
Тады Квальярэла вырашыў наняць дэтэктыва, які і дапамог знайсці злачынцу. Рафаэля Пікала заўважылі, калі ён адпраўляў паведамленні з пагрозамі, а ў паліцыі Неапаля распавялі, што не ведаюць ні пра якое расследаванне з яго боку.
Следства доўжылася 5 гадоў. У лютым 2017-га Рафаэля Пікала нарэшце асудзілі на 4 гады і 8 месяцаў зняволення. Ён так і не прызнаў сваю віну.
Што да фанатаў «Напалі», то яны даравалі Квальярэлу сыход з клуба і нават прысвяцілі яму песню.
Цяпер чытаюць
У Гомелі за палітыку асудзілі кіраўніка аб'яднання, якое шукае парэшткі ахвяраў вайны і сталінскіх рэпрэсій, і яго жонку-медсястру8
Каментары