Пяцігадовы Раян, які праваліўся ў калодзеж у Марока, памёр. Аперацыя па яго ратаванні доўжылася некалькі дзён
Ратавальнікам і валанцёрам не ўдалося выратаваць жыццё пяцігадоваму хлопчыку Раяну, які праваліўся ў калодзеж у паўночным Марока. Група ратавальнікаў вечарам у суботу выйшла з выкапанага імі тунэлю з дзіцем на руках.
Гібель хлопчыка пацвердзіў кароль Марока Махамед VI.
Яшчэ пад зямлёй, калі ратавальнікі толькі дабраліся да Раяна, яго абследавалі медыцынскія спецыялісты. Смяротным для яго магло быць доўгае знаходжанне пад зямлёй або траўмы галавы, піша Бі-бі-сі.
Выратавальная аперацыя, ускладненая небяспекай сходу грунту і мноствам валуноў на шляху ў капальнікаў, працягвалася некалькі дзён. У пятніцу ўвечары брыгада ратавальнікаў і валанцёраў заявіла, што ёй застаецца прайсці тры метры, у суботу днём заставалася менш за метр.
Сумневы ў тым, ці жывое дзіця, суправаджалі ўсю аперацыю. За некалькі гадзін да выратавання ў калодзеж апусцілі кіслародную маску, ежу і ваду, але незразумела, ці змог Раян імі скарыстацца.
У суботу ўвечары мясцовае тэлебачанне прадэманстравала кадры, на якіх ратавальнікі выносілі з выкапанага імі тунэлю дзіця, загорнутае ў жоўтую коўдру.
Незадоўга да гэтага кіраўнік брыгады ратавальнікаў Абдэльхадзі Тамрані заявіў, што па кадрах спушчаных у калодзеж камер было незразумела, у якім стане пяцігадовы Раян — ён проста ляжаў на баку. «Спадзяюся, мы дастанем яго жывым», — сказаў Тамрані.
Аперацыя па выратаванні хлопчыка транслявалася ў прамым эфіры. За ёй сачыла ўся краіна.
Каментары