«Свабода»: Моргі Гомеля і Мазыра перапоўненыя трупамі расіян, іх вязуць у аэрапорт, але пачалі закопваць і ў Беларусі
Што адбываецца ў шпіталях і моргах Гомля і Мазыра, піша «Свабода».
З першага дня вайны беларускія шпіталі ў Гомелі, Мазыры і Нароўлі пачалі прымаць параненых расіян, а моргі — забітых.
З беларускіх медыкаў, як стала вядома «Свабодзе», узялі падпіску аб неразгалошванні інфармацыі. Некаторым лекарам пагражалі скасаваннем кантракта.
Ад крыніц з трэцяга сакавіка паступае інфармацыя, што моргі ў Мазыры і Гомелі перапоўненыя трупамі расіян. У Мазыры з мінулага тыдня іх адразу грузілі ў цягнікі расійскай чыгункі.
«Трупаў было нерэальна шмат! Людзі, якія былі на станцыі Мазыр, былі проста ў шокавым стане ад колькасці трупаў, якія загружалі ў цягнік.
Людзі пачалі здымаць відэа, але да іх прычапіліся вайскоўцы і загадалі выдаліць. У вёсцы Каменка пад Мазыром ачапілі могілкі, нікога туды не пускаюць, выставілі ахову. Можа быць, што там пачалі хаваць расіян. Тым больш, побач з Каменкай — Бокаў, там аэрадром і буйны лагер расіян», — кажа жыхар Мазыра.
Іншая крыніца кажа, што шпіталь у Мазыры дагэтуль перапоўнены параненымі, абсалютна ўсе лекары, нават вузкія спецыялісты, працуюць з параненымі расіянамі. Тым часам мясцовыя жыхары не могуць зрабіць тут рэнтген — іх накіроўваюць у дзіцячую бальніцу.
Жыхары Гомля таксама расказваюць, што і аўтобусы ПАЗ (з параненымі расіянамі) і грузавікі «Урал» (з забітымі) — частае відовішча ў абласным цэнтры.
«На «Уралах» іх трупы вязуць у аэрапорт, адтуль — у Расію», — кажа жыхар Гомеля.
У гомельскім Цэнтры радыяцыйнай медыцыны параненых расіян прымаюць ад пачатку вайны. Туды прыехалі і занялі некалькі паверхаў расійскія лекары. Прымаюць параненых у шпіталі ў Касьцюкоўцы, у Бальніцы хуткай дапамогі і ў абласной клінічнай.
«Свабода» ўжо давала інфармацыю пра тое, што моргі Мазыра і Гомеля перапоўненыя расійскімі вайскоўцамі. Абвяржэння гэтай інфармацыі з боку беларускіх ці расійскіх уладаў не было.
На БТ 12 сакавіка вышаў сюжэт, у якім карэспандэнты называюць трупы расейскіх вайскоўцаў у моргах Мазыра — фэйкам.
Аляксандр Лукашэнка сцвярджаў, што лячэнне ў Беларусі атрымалі каля 160-170 расіян, параненых у баях з украінцамі. «Мы лячылі і будзем лячыць гэтых дзяцей — у Гомелі, Мазыры і, па-мойму, нейкім раённым цэнтры», — казаў Лукашэнка.
Расія пачала ўзброенае ўварванне ва Украіну 24 лютага, у тым ліку з тэрыторыі Беларусі.
-
Што з выездам з Беларусі ў ЕС гэтым летам?
-
Віцэ-губернатар Гомельшчыны пра інцыдэнт пад Бранскам: Перавозчыкі выбралі небяспечны маршрут практычна ў прыфрантавой зоне
-
Дзяржканалы поўняцца абвінавачваннямі на адрас Украіны. Ніводзін дзяржканал не апублікаваў каментары ўкраінцаў. Рэакцыі Лукашэнкі дагэтуль няма
Цяпер чытаюць
Што вядома пра жанчыну, якая загінула ў аўтобусе, што вёз беларускіх футбалістаў-школьнікаў у Геленджык?18
Каментары