Смяротнае пакаранне пагражае пінчуку, якога абвінавацілі ў падрыхтоўцы тэрактаў
Сёння ў Мінскім абласным судзе пачалі судзіць 36-гадовага ўраджэнца Піншчыны Вячаслава Малейчука па «факце арганізацыі 25 сакавіка 2021 актаў тэрарызму ў гарадах Барысаве і Мінску». Яго абвінавачваюць па шэрагу артыкулаў Крымінальнага кодэкса: арт. 14 і ч. 1 і 3 арт. 289 (замах на акт тэрарызму групай асобаў), ч. 3 і ч. 4 арт. 295 (незаконныя дзеянні ў дачыненні да выбуховых рэчываў), ч. 1 арт. 295-3 (незаконныя дзеянні ў дачыненні да прадметаў, дзеянне якіх заснаванае на выкарыстанні гаручых рэчываў). Справу разглядае суддзя Уладзімір Арэшка. Суд праходзіць у закрытым рэжыме, піша «Вясна».
Нагадаем, 26 сакавіка 2021 года МУС заявіла, што прадухіліла тэракты ў Чыжоўцы і ў вайсковай часці ў Печах. На відэа паказалі Малейчука, які казаў, што атрымаў загад ад кагосьці з BYPOL. Са словаў Вячаслава на відэа вынікае, што ў яго быў саўдзельнік Яўген, але сёння судзяць аднаго Малейчука.
Адразу ж пасля затрымання Маляйчук расказвае на камеру пра тое, што мэтай «тэракта» было «выражэнне грамадзянскай пазіцыі». Блізкія мужчыны звярнулі ўвагу «Еўрарадыё» на нехарактэрныя для яго сухія пратакольныя словы і выразы: «произвести взрыв», «изделие», «транспортное средство», «остановочный пункт». А калі аператыўнік пытае яго пра мэту, Маляйчук няўпэўнена адказвае: «Ну, напэўна, дэстабілізацыі…» На следчым эксперыменце Малейчуку зноў задаюць пытанні, і ён зноў часта адказвае казённымі фармулёўкамі.
Вядома, што крымінальную справу супраць Малейчука расследавала следчае ўпраўленне КДБ. Справу распачала Генеральная пракуратура. Фігурантамі гэтай справы з'яўляецца не толькі Малейчук, а і ўдзельнікі ініцыятывы BYPOL.
«Устаноўлена, што да супрацьпраўнай дзейнасці названай незарэгістраванай арганізацыі датычныя Святлана Ціханоўская, Павел Латушка, а таксама 15 грамадзян Беларусі, якія знаходзяцца за мяжой.
У якасці абвінавачаных па крымінальнай справе па ч. 4 арт. 16 і ч. 3 арт. 289 КК Беларусі (акт тэрарызму, учынены арганізаванай групай) прыцягнутыя 18 асобаў. Фігуранты абвешчаныя ў міжнародны вышук», — заяўляў КДБ 2 красавіка мінулага года.
Пасля затрымання КДБ унёс Вячаслава і астатніх фігурантаў гэтай справы ў спіс асобаў, якія маюць дачыненне да тэрарыстычнай дзейнасці.
Чым скончылася следства і як праходзіць суд, невядома, бо яго адразу зрабілі закрытым.
Былыя сілавікі з BYPOL мяркуюць, што пінчук стаў ахвярай правакацыі. Яе мэтай было кінуць цень на Ціханоўскую і іншых праціўнікаў Аляксандра Лукашэнкі, якія да гэтай гісторыі недатычныя.
Хто падпадзе пад «расстрэльны» артыкул пасля зменаў у Крымінальным кодэксе?
Цяпер чытаюць
Сын міністра Кубракова стаў начальнікам Цэнтральнага РУУС Мінска. Маёр, але будзе кіраваць палкоўнікамі4
Сын міністра Кубракова стаў начальнікам Цэнтральнага РУУС Мінска. Маёр, але будзе кіраваць палкоўнікамі
«Пасля першага забойства з ім развялася жонка». Што вядома пра шматдзетнага Сяргея са Столінскага раёна, які пасля вызвалення з калоніі забіў трох чалавек33
Каментары