Зубкова экстрадавалі сёння раніцай. Рашэнне прынятае, нягледзячы на забарону Еўрапейскага суда па правах чалавека (ЕСПЧ), піша «Медыязона».
У Беларусі Зубкова абвінавачваюць у гвалце альбо пагрозе гвалту супрацоўніку органаў унутраных спраў (артыкул 364 КК).
У верасні 2020 года ён удзельнічаў у маршы пратэсту ў Гомелі, дзе яго затрымалі супрацоўнікі АМАП. Зубкова арыштавалі на 15 сутак, а пасля вызвалення ён паехаў на працу ў Маскву.
У жніўні 2021 года прайшлі ператрусы ў яго жонкі і маці. Следчая паказала жонцы Зубкова фатаграфіі, зробленыя падчас аднаго з маршаў, і заявіла, што ён падышоў да супрацоўніка АМАП «бліжэй, чым належыць». А ў кастрычніку 2021-га Зубкова затрымалі ў Маскве.
Інфармацыю аб экстрадыцыі Зубкова пацвердзіла яго адвакат Роза Магамедава:
«Так, сёння а 10-й гадзіне яго адвезлі на самалёт і перадалі ў Беларусь», — сказала абаронца.
«Генпракуратура РФ задаволіла патрабаванне беларускіх уладаў аб экстрадыцыі Зубкова. Мы абскардзілі гэтае рашэнне. 3 мая нам удалося дамагчыся забяспечвальных мераў у рамках правіла 39 рэгламенту ЕСПЧ. Іншымі словамі, Еўрапейскі суд забараніў экстрадыцыю Міхаіла ў Беларусь», — расказалі ў камітэце «Грамадзянскае садзеянне», расійскай праваабарончай арганізацыі. Але да вердыктаў міжнародных судоў Расія, як і Беларусь, не прыслухоўваецца.
Каментары