НАТА павялічыць колькасць сілаў хуткага рэагавання амаль у восем разоў — да 300 тысяч вайскоўцаў. Пра гэта заявіў 27 чэрвеня генеральны сакратар арганізацыі Енс Столтэнберг. На сёння сілы рэагавання НАТА складаюць каля 40 тысяч вайскоўцаў.
Як паведамляе «Бі-Бі-Сі», будуць прынятыя і іншыя меры, якія ўключаюць спецыяльнае разгортванне сіл для абароны канкрэтных саюзнікаў. Столтэнберг падкрэслівае, што гэта «найбуйнейшы перагляд сістэмы калектыўнай абароны і стрымлівання з часоў халоднай вайны». Прычыны вядомыя — агрэсіўная палітыка Расіі і развязаная ёй вайна ва Украіне.
Па словах Столтэнбэрга, на саміце альянсу ў Мадрыдзе, які пройдзе на гэтым тыдні, краіны-ўдзельніцы прымуць новую дактрыну бяспекі, у якой Расія будзе прызнаная не партнёрам арганізацыі, а пагрозай.
Акрамя таго, на канферэнцыі абмяркуюць пытанні ўзмацнення групоўкі «на выпадак узнікнення канфлікту».
Раней, у канцы сакавіка, кіраўніцтва Паўночнаатлантычнага альянсу падвоіла колькасць вайскоўцаў у Балгарыі, Венгрыі, Румыніі і Славакіі.
Каментары