НАТА на саміце ў Мадрыдзе афіцыйна ўхваліў новую Стратэгічную канцэпцыю. Гэта свайго роду план таго, як арганізацыя бачыць свет. І ягонае бачанне значна памянялася ў сувязі з падзеямі апошняга часу, піша Радыё Свабода.
Кіраўнік НАТА Енс Столтэнберг, выступаючы на саміце, адзначыў, што перад арганізацыяй паўсталі найвялікшыя выклікі з часоў Другой сусветнай вайны:
«Мы ўхвалілі новую Стратэгічную канцэпцыю. У ёй апісваецца асяроддзе бяспекі, з якім сутыкаецца Альянс, пацвярджаюцца нашы каштоўнасці і апісваецца ключавая мэта і найвялікшая адказнасць НАТА па забеспячэнні нашай калектыўнай абароны на аснове 360-градуснага падыходу.
Дакумент вызначае тры асноўныя задачы НАТА — стрымліванне і абарону; прадухіленне крызісаў і кіраванне імі; і кааператыўная бяспека. У наступныя гады мы будзем кіравацца гэтым у нашай працы ў духу трансатлантычнай салідарнасці».
У новай Стратэгічнай канцэпцыі Паўночнаатлянтычны альянс выказаўся адносна Расіі і Кітая. Дэкларацыя краін-членаў складаецца з 22 пунктаў.
Пра Расію там гаворыцца:
«Расійская Федэрацыя з'яўляецца найбольш значнай і непасрэднай пагрозай бяспецы саюзнікаў, міру і стабільнасці ў еўраатлантычным рэгіёне. Яна імкнецца стварыць сферы ўплыву і прамога кантролю з дапамогай прымусу, падрыўной дзейнасці, агрэсіі і анексіі, выкарыстоўвае звычайныя, кібер— і гібрыдныя сродкі супраць нас і нашых партнёраў. Вайсковая рыторыка і даказаная гатоўнасць выкарыстоўваць сілу для дасягнення сваіх палітычных мэтаў падрываюць заснаваны на правілах міжнародны парадак».
Таксама ў тэксце адзначана, што Расія мадэрнізуе свае ядзерныя сілы і пашырае свае новыя разбуральныя сістэмы падвойнай дастаўкі, адначасова выкарыстоўваючы прымусовую ядзерную сігналізацыю. Гэта накіравана на дэстабілізацыю краін на ўсходзе і поўдні Альянсу. На Крайняй Поўначы здольнасць сарваць падмацаваньне саюзнікаў і свабоду суднаходства праз Паўночную Атлантыку — стратэгічны выклік для Альянсу.
«Нарошчванне маскоўскіх войскаў, у тым ліку ў рэгіёнах Балтыйскага, Чорнага і Міжземнага мораў, разам з вайсковай інтэграцыяй з Беларуссю кідаюць выклік нашай бяспецы і інтарэсам», — дадалі ў НАТА.
Пры гэтым у тэксце адзначаюць, што НАТА не імкнецца да канфрантацыі і не ўвасабляе пагрозы для Расіі, аднак будзе «адказна рэагаваць на расійскія пагрозы і варожыя дзеянні». Абяцаюць значна ўзмацніць стрымліванне і абарону для ўсіх саюзнікаў, павысіць устойлівасць супраць расійскага прымусу.
«У святле яе варожай палітыкі і дзеянняў, мы не можам лічыць Расійскую Федэрацыю нашым партнёрам. Тым не менш, мы па-ранейшаму гатовыя захаваць адкрытыя каналы сувязі з Масквой, каб кіраваць і змякчаць рызыкі, прадухіляць эскалацыю і павышаць празрыстасць. Мы імкнемся да стабільнасці і прадказальнасці ў еўраатлантычнай прасторы».
Адносна Кітая ў Альянсе лічаць, што «заяўленыя амбіцыі і палітыка прымусу Кітайскай Народнай Рэспублікі кідаюць выклік інтарэсам, бяспецы і каштоўнасцям», што дэкларуе НАТА:
«КНР выкарыстоўвае шырокі спектр палітычных, эканамічных і ваенных інструментаў для павелічэння сваёй глабальнай прысутнасці і магутнасці праектаў, застаючыся непразрыстым адносна сваёй стратэгіі, намераў і вайсковага нарошчвання.
Шкоднасныя гібрыдныя і кібераперацыі КНР і яе канфрантацыйная рыторыка і дэзынфармацыя нацэленыя на саюзнікаў і шкодзяць бяспецы Альянсу».
Кітай імкнецца кантраляваць ключавыя тэхналагічныя і прамысловыя сектары, крытычную інфраструктуру, а таксама стратэгічныя матэрыялы і ланцужкі паставак. Ён выкарыстоўвае свае эканамічныя рычагі для стварэння стратэгічных залежнасцяў і ўзмацнення ўплыву, імкнецца падрываць заснаваны на правілах міжнародны парадак, у тым ліку ў касмічнай, кібер— і марской сферах.
«Паглыбленне стратэгічнага партнёрства паміж Кітаем і Расіяй і іх узаемныя спробы падарваць заснаваны на правілах міжнародны парадак супярэчаць нашым каштоўнасцям і інтарэсам.
Мы па-ранейшаму адкрытыя для канструктыўнага ўзаемадзеяння з КНР, у тым ліку дзеля стварэння ўзаемнай празрыстасці, з мэтай абароны інтарэсаў бяспекі Альянсу».
Таксама ў НАТА адзначылі, што будуць надалей, як і з Расіяй, дыпламатычным шляхам спрабаваць ліквідаваць напружанасць.
Каментары