«Дыскрэдытаваў» Беларусь відэазапісам аб яе эканоміцы — паўтара года калоніі
Праваабаронцы даведаліся пра вынікі судовага разбіральніцтва па справе Васіля Чыха, якога абвінавачваюць у дыскрэдытацыі Беларусі па арт. 369-1 КК, паведамляе «Вясна».
Справу разглядаў старшыня суда Брэсцкага раёна Сяргей Маручак, які не раз выносіў палітычна матываваныя прысуды.
Вядома, што абвінавачанаму 30 гадоў. У віну Васілю Чыху ставяць тое, што 16 сакавіка гэтага года ў адным з публічных вайбер-чатаў, які аб'ядноўвае работнікаў вагоннага дэпо Брэста, ён «размясціў відэазапіс з загадзя ілжывымі звесткамі аб эканамічным і сацыяльным становішчы Рэспублікі Беларусь».
Падрабязнасцяў з залы суда амаль няма. Вядома толькі, што падчас судовага пасяджэння абвінавачаны прызнаў сваю віну і раскаяўся.
У выніку суд прызнаў Васіля Чыха вінаватым ва ўчыненні злачынства паводле арт. 369-1 КК «Дыскрэдытацыя Рэспублікі Беларусь», пакараўшы яго 1,5 года пазбаўлення волі без штрафу з адбываннем пакарання ў папраўчай калоніі ва ўмовах агульнага рэжыму.
Мабільны тэлефон, як прыладу здзяйснення злачынства, суд пастанавіў канфіскаваць на карысць дзяржавы. Прысуд не ўступіў у законную сілу, можа быць абскарджаны і апратэставаны ў апеляцыйным парадку.
«Сумны горад, пра які прынята добра казаць». Расіянка раскрытыкавала Мінск — беларусы ёй іранічна падзякавалі26
Каментары