«Я хачу бачыць рускую мову, а не пшэцкую лацінку». Бухгалтарка з райцэнтра змагаецца супраць беларускай лацінкі
Ужо каля месяца па розных праўладных і прарасійскіх тэлеграм-каналах гуляе адно і тое ж паведамленне пра тое, што трэба забараніць і прыбраць з усіх грамадскіх месцаў беларускую лацінку. Даведаліся, хто ўзяўся гэта рабіць.
Зрывала бела-чырвона-белыя сцягі ў пад'ездах, скардзілася, што сябры адвярнуліся
Адказнасць за змаганне з беларускай лацінкай на сябе ўзяла Юлія Дударэнка. Ёй 38 гадоў, яна родам са Стоўбцаў, працавала бухгалтаркай спачатку ў Дэпартаменце аховы МУС, а пасля ў пары іншых дзяржаўных устаноў.
Шлях у праўладны актывізм для Юліі пачаўся з сярэдзіны верасня 2020 года — тады яны з мужам упершыню паўдзельнічалі ў праўладным аўтапрабегу. З гэтага часу яны неаднаразова ездзілі туды, як і на акцыі каля ГЦ «Спектр» ва Уруччы.
Акрамя гэтага, яна вельмі актыўная ў розных чатах. Там жанчына дзялілася ўражаннямі з прабегаў і распавядала пра тое, як знішчала беларускую сімволіку ў сваім пад'ездзе.
У каментарах Юліі чыталася болей суму, чым нянавісці. Яна перажывала, што за яе погляды ад яе адвярнуліся некаторыя сябры і сваякі, злавалася на пасіўнасць праўладнага лагера.
Даходзіла нават да крамольных думак.
У студзені 2021 года ў дваровы чат выклалі фота яе з мужам пасля праўладнага прабегу, што прадказальна не дадало ёй любові да прыхільнікаў зменаў і зрабіла яе погляды, здаецца, больш радыкальнымі.
Аднойчы Юлія нейкім чынам наткнулася на канал «інфаказачкі» Вольгі Бондаравай. І вектар яе змагання крута змяніўся.
Бондарава і яе «паства»
Бондарава ўяўляе цемрашальскую плынь прарасійскіх актывістаў у Беларусі, якія змагаюцца супраць усяго беларускага і таго, што самі адвольна вызначаюць як заходняе. Яны не змагаюцца супраць прыдуманага і часткова кіраванага Захадам інтэрнэту ці тэхналогій мабільнай сувязі, але выдумляюць «заходнія» наратывы там, дзе іх фактычна няма (скажам, лічаць «заходнімі прыдумкамі» хатні гвалт і каранавірусныя абмежаванні).
Бондарава мэтанакіравана прасоўвае сваёй аўдыторыі патрэбныя ёй наратывы і спрабуе аб'яднаць вакол сябе найбольш радыкальных прарасійскіх актывістаў (прарасійскія актывісты з каманды Лушча яе не любяць), фанатаў СССР і аматараў розных тэорыяў змоваў. Вакол яе канала склалася асяроддзе, якое пастаянна бачыць «бэчэбэшную і заходнюю агентуру» ў розных галінах улады і ставіць сабе за мэту яе перамагчы.
Акрамя іншага, Бондарава наладжвае сувязі з аднадумцамі сярод мясцовых уладаў і сілавікоў. Яе крыважэрныя допісы пра тое, што трэба ўсіх бязлітасна караць, рэгулярна рэпосцяць каналы з сеткі, кіраванай ГУБАЗіКам.
Бондарава таксама помслівая. Калі ёй нехта не спадабаўся ці крытыкуе яе, то яна будзе змагацца з ім да канца. «Пул Бондаравай» зацята атакуе менш радыкальных праўладных актывістаў — блогера Аляксея Голікава, некаторых чальцоў праўладнага Саюза блогераў і нават «Белую Русь».
Дзесьці ў красавіку 2021 года Юлія далучаецца да чатаў вакол Бондаравай. Тут яна працягвае змаганне — толькі ўжо з тым, з чым прапануе змагацца «інфаказачка». І дапамагае шукаць «няправільных» людзей і мерапрыемствы.
Да прыкладу, у гэтым пасце Бондаравай бачна, што даслала яго ёй менавіта Юлія.
Юлія актыўна падтрымлівала таксама адмову ад абавязковых прышчэпак і нашэння масак.
А таксама выступала за забарону арганізацый, у назве ці статутных дакументах якіх было слова «гендар». Хоць гэтыя арганізацыі змагаліся супраць хатняга гвалту.
Акрамя ўсяго іншага, у гэтых чатах выступаюць супраць «лічбавізацыі» жыцця і адукацыі: некаторыя ў гэтым бачаць «падкопы сатаністаў», іншыя — руку загадкавага Захаду.
Кампанія супраць беларускай лацінкі
Адным з прадметаў нянавісці Бондаравай з'яўляецца беларуская мова. Яна шляхам розных маніпуляцыяў здолела пераканаць сваіх прыхільнікаў у тым, што беларуская лацінка — гэта вялікае зло. Аргументы такія: яна аддаляе нас ад Расіі, на ёй пісаў «польскі фашыст Каліноўскі», а яшчэ яна прыніжае рускамоўных грамадзян.
Чыноўнікі на звароты прыхільнікаў адмены лацінкі раней не рэагавалі — хутчэй за ўсё, не праз прынцыповую пазіцыю, а праз нежаданне выдзяляць на гэта грошы ў няпросты для бюджэту час. Бо гэта ж не жарт — змяніць шыльды з беларускай лацінкай ва ўсёй краіне.
Пасля гэтага прыхільнікі Бондаравай пачалі вялікую кампанію супраць беларускай лацінкі на вуліцах (згадванне яе знайшлося больш чым у трыццаці розных праўладных і прарасійскіх чатах). Каардынатарам выступіла акурат Юлія Дударэнка. Вось яе допісы з чатаў.
Праўда, не вядома, ці будзе кампанія мець поспех, бо пакуль што аніякіх станоўчых вынікаў яна не дала.
«Наша Нiва» — бастыён беларушчыны
ПАДТРЫМАЦЬ
Каментары
Приятно смотреть, как подыхает самая п₽скудная из всех Ымпэрый , как сокращается число полезных идиотов—подобно шагреневой коже. ябатьки, даражэнькия, вам не кажется —вас действительно критическое меньшинство, которое из всех сил поддерживает одутловатый ветшающий колхозник. Понятно, что под страхом репрессий адекватное большинство молчит. И ждёт. И вот когда наступит время Ч, вы мгновенно в этом убедитесь,вспомните хотя бы,сколько людей было возле Стеллы.
Только тогда все обувь снимали. А вот теперь все сделали правильные выводы,и обувь никто снимать не будет. Как и договариваться с садистами...