Студэнтку і інжынера ў Мінску асудзілі па «народным» артыкуле другі раз
У судзе Ленінскага раёна Мінска асудзілі ўдзельнікаў акцый пратэсту ў Мінску інжынера Мацвея Стасюлевіча і студэнтку Анастасію Марвіну. Іх абвінавацілі паводле ч. 1 арт. 342 Крымінальнага кодэкса (арганізацыя і падрыхтоўка дзеянняў, якія груба парушаюць грамадскі парадак, альбо ўдзел у іх), піша «Вясна».
Справу разглядала суддзя Юлія Шут.
Па матэрыялах абвінавачання, Стасюлевіч і Марвіна, даведаўшыся з інтэрнэту аб запланаванай у Мінску акцыі пратэсту, у адзін з вераснёўскіх дзён прынялі ўдзел у несанкцыянаваным масавым мерапрыемстве, рухаліся ў складзе калоны па тэрыторыі горада Мінска, у тым ліку на праезнай частцы і паблізу праспекта Незалежнасці і вуліцы Леніна, пры гэтым Стасюлевіч публічна выкрыкваў лозунгі, блакаваў і загароджваў шлях транспартным сродкам.
Акалічнасцю, якая абцяжарвае адказнасць абвінавачаных, судом прызнаецца здзяйсненне злачынства асобай, якая раней учыніла якое-небудзь злачынства, і яшчэ не скончыўся тэрмін даўнасці за папярэдняе злачынства. Падчас суда высветлілася, што і Мацвей, і Анастасія раней былі пакараныя па гэтым самым артыкуле — ч. 1 арт. 342 Крымінальнага кодэкса.
Суд прызнаў іх вінаватымі і прызначыў абаім пакаранне ў выглядзе абмежавання волі без накіравання ў папраўчую ўстанову адкрытага тыпу на тэрмін тры гады (хатняя хімія).
Каментары