Такаеў перамагае на выбарах у Казахстане з лукашэнкаўскімі працэнтамі
У Казахстане, дзе сёння адбываліся прэзідэнцкія выбары, сталі вядомыя вынікі экзіт-полаў. Яны сведчаць пра тое, што дзеючы кіраўнік дзяржавы Касым-Жамарт Такаеў набірае будзённыя для аўтакратаў на постсавецкай прасторы 80+ працэнтаў.
Так, згодна з вынікамі экзіт-пола, праведзенага ў нядзелю Міжнародным інстытутам рэгіянальных даследаванняў «Адкрытае грамадства», Касым-Жамарт Такаеў перамог на нядзельных выбарах кіраўніка дзяржавы, набраўшы 82,45 % галасоў.
Іншы экзіт-пол, праведзены Інстытутам грамадскай палітыкі партыі «Аманат», дае Такаеву яшчэ больш: 85,52 % галасоў.
Усе астатнія кандыдаты не набіраюць нават 4 % галасоў. Найлепшы пасля Такаева вынік пакуль у кандыдата ад партыі «Ауіл» Жыгулі Дайрабаева — 3,33 % галасоў. Але ўвогуле другі па папулярнасці кандыдат — «Супраць усіх», якому даюць больш за 5 % галасоў.
Гэтыя выбары ў Казахстане — пазачарговыя і праводзяцца паводле новай Канстытуцыі. Згодна з ёй, прэзідэнт абіраецца не па 5 гадоў, як раней, а на 7, але не мае права на пераабранне.
Касым-Жамарту Такаеву цяпер 69 гадоў, праз 7 гадоў, адпаведна, будзе 76.
Каментары
Подкрутят до 95%